Latviya hukumati mamlakatda rus tilidan foydalanishni cheklashga qaratilgan qaror tayyorlamoqda. Xususan, rus tili ikkinchi chet tili sifatida maktablarda o‘qitilmaydi. Bu haqda Delfi xabar berdi.
Rus tilini ikkinchi chet tili sifatida o‘rganishni taqiqlovchi qaror 23-aprelda qabul qilinadi. 2026/2027-o‘quv yilidan boshlab o‘quvchilar Yevropa Ittifoqi yoki Yevropa iqtisodiy hududiga aʼzo davlatlarning rasmiy tillaridan birini ikkinchi chet tili sifatida tanlaydi. Latviya taʼlim vazirligi taqiqni jamoatchilik muhokamasiga qo‘yganida 300 dan ortiq eʼtirozlar kelib tushgan.
Norozilikning asosiy sabablari: bolalar “ona tilini o‘rganish bilan cheklanib qolmasligi kerak”, shuningdek, “qaysi tilni o‘rganishni o‘zi hal qilishi lozim”.
Bundan tashqari, tashabbus tanqidchilari “rus tilidan voz kechish siyosiy sabablarga ko‘ra qabul qilinishi mumkin emas” deb baholaydi.
Latviyadagi maktablarda birinchi chet tili birinchi sinfdan boshlab o‘qitiladi. Ikkinchi chet tili esa boshlang‘ich sinf tugashidan boshlab dars jadvalidan o‘rin oladi. Darhaqiqat, Latviyada rus tili ko'pincha ikkinchi chet tili sifatida tanlangan, chunki maktablarda boshqa tilli o'qituvchilar yetarli emas.
Izoh (0)