Giyohvandlik vositalarining kontrabandasiga qarshi kurashish doirasida DXX Chegara qo‘shinlari harbiy xizmatchilari tomonidan olib borilgan tezkor-qidiruv tadbirlari natijasida bir nechta noqonuniy holatlarga chek qo‘yildi.
Qayd etilishicha, o‘zbek—tojik davlat chegarasining Samarqand viloyati Urgut tumani “Chep” qishlog‘i hududidan o‘tgan qismida nomaʼlum shaxslar tomonidan Tojikistondan olib kelinib, qoldirib ketilgan 980 gramm geroin moddasi borligi aniqlanib, protsessual tartibda rasmiylashtirib olingan. Hozirda ushbu giyohvandlik vositasi egalarining shaxsiga aniqlik kiritish bo‘yicha zarur chora-tadbirlar amalga oshirilmoqda.
Andijon viloyatida kuzatilgan holatda, Qo‘rg‘ontepa tumanining Qorasuv shahrida yashovchi, muqaddam sudlangan 28 yoshli shaxs tarkibida “Pregabalin” kuchli taʼsir qiluvchi moddasi bo‘lgan 30 ming dona “Nervegesic” nomli dori vositasini Qirg‘izistondan davlat chegarasi orqali noqonuniy ravishda o‘tkazgan vaqtida ushlangan.
Bunday qonunbuzilishi Namangan viloyatida ham qayd etilib, unda 3121 dona “Tropikamid” kuchli taʼsir qiluvchi dori vositalarini Qirg‘izistondan kontrabanda yo‘li bilan Kosonsoy tumani hududiga o‘tkazgan vaqtida 1992 va 1993-yillarda tug‘ilgan ikki nafar mahalliy fuqaro ashyoviy dalillar bilan qo‘lga olingan. Shuningdek, ularning 36 va 31 yoshli ikki nafar jinoiy sheriklari ham protsessual tartibda ushlangan.
Hozirda uchala holat yuzasidan jinoyat ishlari qo‘zg‘atilib, qonunbuzarlarga nisbatan qamoq ehtiyot chorasi qo‘llanilgan.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan, DXX tomonidan Tojikiston va Qirg‘izistondan olib kelingan narkotik moddalar to‘xtatib qolingan edi.
Izoh (0)