Raqobat qo‘mitasi Magic City’ning investor kompaniyasidagi ulushni o‘tkazishni ma’qulladi. Bu haqda qo‘mita axborot xizmati xabar berdi.
Ma’lum qilinishicha, “Xonadon taomlar” MCHJning Stargate Systems MCHJning 86,2 foiz ulushlarini olish bo‘yicha arizasi ko‘rib chiqilgan.
Qo‘mitaning Maxsus komissiyasi tomonidan o‘tkazilgan tahlil natijalariga ko‘ra, mazkur bitimlar bozorda raqobatga ta’sir ko‘rsatmasligi bo‘yicha xulosaga kelingan va arizani qanoatlantirish hamda bitimlarga rozilik berish haqida qaror qabul qilingan.
Statistika agentligi ma’lumotlariga ko‘ra, Stargate Systems MCHJ ko‘ngilochar va dam olish bog‘lari faoliyati bilan shug‘ullanuvchi tashkilot hisoblanadi. Kompaniyaning ustav kapitali 426,94 mlrd so‘mni tashkil etib, ayni paytda uning 86,2 foizi 2019-yilda tashkil etilgan “Tashkent Aquarium”ga tegishli. Qolgan 13,8 foiziga prezidentning sobiq maslahatchisi Abdujabbor Abduvohitovning (Jahongir Ortiqxo‘jayevning qudasi) o‘g‘li Alisher Abdujabarovich Abduvohitov egalik qiladi. U bir vaqtning o‘zida ustav fondi 57,04 mlrd so‘mga teng bo‘lgan “Tashkent Aquarium”ning yagona mulkdori hisoblanadi.
2023-yilning 27-dekabr kuni tashkil etilgan “Xonadon taomlari” restoran va oziq-ovqat mahsulotlari yetkazish xizmatlarini ko‘rsatish sohasida faoliyat yuritadi. 50 mln so‘mlik ustav kapitaliga ega kompaniyaning yagona ta’sischisi Muhamadiyev Firdavs Fayzulloyevich, rahbari esa Abdumajidov Bekzod Muzaffarovchi hisoblanadi.
E’tiborlisi, yuqoridagi barcha kompaniyalar Chilonzor tumani, “Beshyog‘och” MFY, Olmazor dahasi, 183-A uyda joylashgan.
Bundan ko‘rinib turibdiki, Magic City’ning mulkdori faqat hujjatlardagina o‘zgargan bo‘lishi mumkin.
Magic City istirohat bog‘i Milliy bog‘ hududida 2021-yil iyun oyida ochilgan. Loyiha investori Akfa tarkibiga kiruvchi Stargate Systems bo‘lgan. Kompaniya Milliy bog‘ning 20,79 gektar bo‘lgan bog‘ hududini 49 yilga ijaraga olgan.
O‘tgan yilning boshida Toshkent shahrining sobiq hokimi va tadbirkor Jahongir Ortiqxo‘jayev o‘zining 7 ta kompaniyasi, jumladan, Magic City parki va Mediapark texnika do‘konlari tarmog‘ini sotganini bildirgandi.
Raqobat qo‘mitasi xabari yuzasidan iqtisodchi Otabek Bakirov 8 yil davomida uchinchi marta Stargate Systems MCHJning ulushdori o‘zgarayotgani yuzasidan o‘z munosabatini bildirib, savollarni o‘rtaga tashladi.
“Albatta, bu bitim ortidan Magic City operatorining haqiqiy benefitsiarlari yana o‘zgarmoqdami yoki yo‘qmi, chuqurroq o‘rganishsiz bir nima deyish qiyin.
Lekin aniqki, 8 yil avval davlatdan Milliy bog‘ning qariyb 21 gektarini olib egallagan va qator majburiyatlar olgan investor endi butunlay boshqa. De yure va de-fakto boshqa investor. Birinchi “investor” otning ustida bo‘lib ulushini sotdi, ketdi, keyin ikkinchisi keldi, endi uchinchisi.
Tabiiyki, savol tug‘iladi, davlat bilan xususiy sheriklik yoki boshqa maqomda bitim tuzilganda bitim tuzgan subyektning benefitsiari, aksiyadori, ulushdori o‘zgarmasligi yoki davlatning roziligi qoidasi bo‘lishi kerak emasmi?
Uzoqqa bormaylik, oddiy kredit yoki qarz ajratilayotganda ham qarzdorning ta’sischilari yoki aksiyadorlarni kreditorning roziligisiz o‘zgartirilmasligi talabi temir qoida hisoblanadi.
O‘zbekistonda “xususiylashtirish”dan tortib “davlat xususiy sheriklik” deyilgan yangi ko‘zbo‘yamachiliklargacha trillionlab qiymatdagi aktivlar bilan bitim tuzilayotganda esa davlatning, demakki, xalqning oddiy manfaatlari mantig‘i unutib qoldiriladi.
Hech bo‘lmaganda, ta’sischi, aksiyador o‘zgarishi bilan avvalboshda kelishilgan imtiyoz va preferensiyalar bekor bo‘lishi yoki yangi muzokaralar asosida to‘lovlar ko‘rib chiqilishi tamoyillari amal qilmaydi.
Raqobat qo‘mitasi shunaqa “qo‘shilish va sotilish” bitimlariga ruxsat berishda, vaqti-vaqti bilan shu himoya mantig‘ini yodga solib tursa bo‘lardi” deydi iqtisodchi.
Izoh (0)