Toshkent shahrining Yakkasaroy tumanidagi rassomchilik maktabi o‘qituvchisi dars paytida o‘quvchi qizga shilqimlik qilgani uchun 5 sutkaga qamalgandi. Bolalar ombudsmani sud qaroriga protest kiritdi.
2025-yil 3-mart kuni Toshkent shahar jinoyat ishlari bo‘yicha Yakkasaroy tuman sudida 2015-yilda tug‘ilgan voyaga yetmagan A.B.ga qarshi sodir etgan shahvoniy shilqimlik harakatlari yuzasidan o‘qituvchi M.D.ning qilmishi ko‘rib chiqilgan va unga Maʼmuriy javobgarlik to‘g‘risidagi kodeksning 41-1-moddasi 1-qismi bilan (shahvoniy shilqimlik qilish) 5 sutka maʼmuriy qamoq jazosi tayinlangan.
Bolalar ombudsmani chiqarilgan qarorni bola huquqlarini ta’minlanishi nuqtayi nazardan o‘rganib, ushbu qaror bolaning manfaatiga zidligi munosabati bilan Toshkent shahar prokuraturasiga mazkur sud qarori ustidan apellyatsiya tartibida protest bildirishga oid iltimosnoma kiritgan.
Toshkent shahar prokuraturasining bolalar ombudsmani iltimosnomasini ko‘rib chiqishi yuzasidan bildirishicha, birinchi instansiya sudining mazkur qarori ustidan apellyatsiya tartibida prokuror protesti kiritildi.
Natijada Toshkent shahar sudining 4-martdagi apellyatsiya tartibidagi qarori bilan birinchi instansiya sudining M.D.ga nisbatan qarori bekor qilinib, ish materiallari qo‘shimcha tergovga qadar tekshiruv yuritish uchun tuman prokuraturasiga qaytarilgan va hozirda tergov harakatlari olib borilmoqda.
Izoh (0)