Isroil armiyasi 18-martga o‘tar kechasi G‘azo sektoridagi nishonlarga aviazarbalar berishni tikladi. Yahudiy davlati mudofaa vaziri Israel Kats jangovar harakatlar qayta boshlanganini tasdiqladi. Hujum oqibatida 200 dan ortiq odam, jumladan, bolalar halok bo‘ldi. Bu haqda Al Jazeera xabar berdi.
Isroilning aviazarbasi oqibatida HAMAS siyosiy byurosi a’zosi Abu Ubayda al-Jamasiy va uning oilasi ham halok bo‘lgan. Hujumni qayta tiklash buyrug‘i Isroil bosh vaziri Binyamin Netanyaxu va mudofaa vaziri tomonidan berilgan. Netanyaxuga ko‘ra, o‘t ochishni to‘xtatish rejimini uzaytirish bo‘yicha muzokaralarda oldinga siljish yo‘qligiga javoban shunday qaror qabul qilgan. Isroil mudofaa vaziri esa “garovga olinganlar uylariga qaytarilmaguncha va bu urushda barcha maqsadlarga erishmaguncha” jangovar harakatlar to‘xtatilmasligini aytmoqda.
HAMAS Isroilning o‘t ochishni to‘xtatish to‘g‘risidagi kelishuvni buzishi garovdagilar taqdirini shubha ostiga qo‘yishini bildirdi. Oq uy matbuot kotibi Karolin Levitt hujumlar yuzasidan Tramp ma’muriyati oldindan xabardor qilinganini qayd etdi.
Axborot agentliklari Isroil rahbariyatidagi manbalariga tayanib HAMASning o‘rta darajadagi qo‘mondonlari, guruh rahbariyati va uning infratuzilmasi zarbalar nishoniga aylanganini aytmoqda. Ular bu operatsiya havo zarbalari bilan cheklanmasligini taxmin qilmoqda.
Jangovar harakatlar o‘t ochishni to‘xtatish rejimi kuchga kirganidan ikki oy o‘tgach qayta tiklandi. Kelishuv doirasida HAMAS guruhi Isroil qamoqxonalaridan ikki mingga yaqin falastinlikni ozod qilish evaziga o‘ttizdan ortiq isroillik garovga olinganlarni ozod qildi. Sulhning birinchi bosqichi ikki hafta oldin yakunlandi, sulhning keyingi bosqichi bo‘yicha muzokaralar, garovga olingan oltmishga yaqin odamni ozod qilish, Isroil taxminlariga ko‘ra, ularning yarmidan kamrog‘i tirik va urushni to‘xtatish bo‘yicha kelishuv boshi berk ko‘chaga kirib qolgan.
Bir necha kun oldin AQSH prezidenti Donald Tramp o‘zining ijtimoiy tarmoqdagi sahifasida HAMAS guruhiga “so‘nggi ogohlantirish” berib, barcha isroillik garovga olinganlarni ozod qilishni talab qilgan edi. U HAMASning barcha a’zosini yo‘q qilish uchun Isroilga zarur bo‘lgan barcha narsani yuborishini qayd etgandi.
Izoh (0)