Shavkat Mirziyoyevning topshirig‘idan so‘ng Abdulla Aripov mahalliy avtomobildan foydalanishga o‘tgan. Bu ma’lumotni bosh vazir matbuot kotibi Bekzod Hidoyatov “Daryo”ga tasdiqladi.
Abdulla Aripov 7-mart kuni videoselektor yig‘ilishi o‘tkazib, barcha amaldorlarga xorijiy xizmat mashinalaridan foydalanishni to‘xtatishni topshirgan.
Bosh vazir matbuot kotibi Behzod Hidoyatovning “Daryo”ga tasdiqlashicha, amaldorlar bu qoidani 1-apreldan joriy qilishni taklif etgan.
“Prezidentimiz bergan barcha topshiriqlarni so‘zsiz bajarishimiz shart, muhokamaga o‘rin yo‘q. Menga buni 20-martdan yoki 1-apreldan joriy qilaylik, deb taklif berishyapti. Yo‘q, unaqasi ketmaydi. Prezidentimiz topshiriq berdimi, zudlik bilan bajarishimiz shart. Bu hukumatning asosiy vazifasi”, degan bosh vazir videoselektorda.
Bosh vazir matbuot kotibining qo‘shimcha qilishicha, bugungi kunda hukumat tarkibidagi barcha vazirliklar, idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari xizmat avtomobili sifatida mahalliy avtotransportlardan foydalanishga o‘tgan. Shu kungacha foydalanib kelingan joriy avtotransport vositalari esa bosqichma-bosqich “E-auksion” – elektron savdo platformasi orqali sotuvga chiqariladi.
Shavkat Mirziyoyev 5-mart kuni korrupsiyaning oldini olish bo‘yicha ishlar natijadorligi va kelgusidagi ustuvor vazifalarga bag‘ishlangan kengaytirilgan yig‘ilishda xizmat transportida yurishni keskin qisqartirib, O‘zbekistonda ishlab chiqarilgan avtomobilga va mebelga o‘tish zarurligini aytgandi.
Iqtisodiyot va moliya vazirligi, Hisob palatasiga parlamentning byudjetga mas’ul qo‘mitalari bilan birgalikda to‘g‘ridan to‘g‘ri xaridlarni ikki karra qisqartirish topshirildi.
Izoh (0)