Shavkat Mirziyoyev 29-aprel kuni III Toshkent xalqaro investitsiya forumiga tayyorgarlik bo‘yicha taqdimot bilan tanishdi.
Prezident matbuot xizmatining xabar qilishicha, 2022-yilda o‘tgan ilk forumga 56 mamlakatdan mingdan ziyod xorijiy mehmonlar kelgan bo‘lsa, bu yil 84 ta davlatdan qariyb 2 500 kishi qatnashishi kutilmoqda. Ular orasida hukumat vakillari, yirik kompaniyalar rahbarlari, BMT, YETTB, OPЕK, SHHT kabi xalqaro tashkilotlardan yuqori martabali mehmonlar bor.
Shu bois forumga puxta tayyorgarlik ko‘rish maqsadida Vazirlar Mahkamasi farmoyishi qabul qilindi. Investitsiyalar, sanoat va savdo vazirligi tomonidan tegishli vazirliklar bilan hamkorlikda barcha tashkiliy chora-tadbirlar ko‘rildi.
Forum mamlakatning iqtisodiy imkoniyatlarini ko‘rsatish hamda o‘zaro manfaatli loyihalarni kelishish uchun qulay maydondir. Shu bois uning doirasidagi tadbirlar, muhokama qilinadigan masalalar ko‘p. Jumladan, sho‘ba majlislari, davra suhbatlari, taqdimotlar, hukumatlararo komissiya yig‘ilishlari kabi 40 dan ortiq tadbirlar rejalashtirilgan. Shuningdek, O‘zbekistondagi qator loyihalarni ishga tushirish marosimi ko‘zda tutilgan.
Davlat rahbari forumni yuqori darajada tashkillashtirish, har bir tarmoq va hududning investitsiyaviy salohiyatini to‘la namoyon etish bo‘yicha ko‘rsatmalar berdi.
3-may kuni Prezident huzuridagi Xorijiy investorlar kengashining ikkinchi yalpi majlisi ham o‘tkaziladi.
Ma’lumot uchun, 2022-yilda o‘tkazilgan birinchi forumda 7,8 million dollarlik investitsion bitimlar imzolangan edi, ikkinchisida esa ushbu ko‘rsatkich 11 milliard dollardan oshdi. Joriy yilda investorlar bilan 17 milliard dollarlik portfel shakllantirilgan.
Izoh (0)