Qashqadaryo viloyatining Shahrisabz shahrida mast fuqaro tanishini otib qo‘ydi. Qotillik qo‘lbola usulda yasalgan qurolda sodir etilgan. Bu haqda “Daryo” so‘roviga javoban Bosh prokuratura axborot xizmati ma’lum qildi.
Aniqlashtirilishicha, qotillik voqeasi 2024-yilning 29-mart kuni taxminan 19:30 da sodir bo‘lgan.
Shahrisabz shahrining “Qo‘shxona” mahallasida yashovchi Sh.U. 29-mart kuni soat 15:00 larda Damas avtomobilida ketayotganda o‘ziga oldindan tanish bo‘lgan Sh.R.ni ko‘rib qolib, birgalikda “Lola” kafesiga borgan va spirtli ichimlik iste’mol qilgan. Taxminan bir soatlardan so‘ng ular kafedan chiqib, yana bir tanishi T.A.ni ko‘rib qolib, uni ham avtomashinaga mindirib, uchalasi spirtli ichimlik iste’mol qilish maqsadida boshqa kafega borgan, — deyiladi Bosh prokuratura axborotida.
Bildirilishicha, ulfatlar kafeda yana spirtli ichimlik iste’mol qilib, mast holda bazm pulini to‘lash ustida tortishib qolgan.
Sh.U. tanishi T.A.ga yo‘lda kelayotgan paytda 50 ming so‘m pul berganligini, shu bois ovqatlanish xarajatini to‘liq to‘lashini aytgan. Sherigi esa unga hamma pulni to‘lamasligini bildirib, undan olgan 50 ming so‘m pulini qaytarib bergan. U.Sh. pulni olmasdan unga “Pulni cho‘ntagingga solib qo‘y”, deya jahl qilib, avtomobilidagi temir quvurdan qo‘lbola usulda yasalgan qurolni olib, sherigining boshiga bir marta o‘q uzgan. Hamda voqea joyidan ketib qolgan. Natijada T.A. olgan tan jarohati oqibatida Shahrisabz shahar tibbiyot birlashmasi shoshilinch tez tibbiy yordam bo‘limiga yotqizilgan, — deydi mas’ul.
Qo‘shimcha qilinishicha, sherigiga o‘q uzgan U.Sh. hodisa joyidan qochmoqchi bo‘lib, avtomobilida ketayotgan paytda voqea joyidan taxminan 500 metr uzoqlikda bo‘lgan IIB tezkor xodimlari tomonidan ushlangan.
Shahrisabz shahar tibbiyot birlashmasining 29-mart kuni taqdim etilgan ma’lumotnomasida T.A.ning tanasida og‘ir ochiq teshib o‘tuvchi bosh miya jarohati, bosh miya ichidagi metal va suyak parchalari, chap peshona suyagining parchalanib singan jarohati, chap qosh ustida ezilib yirtilgan ko‘rinishida tan jarohatlari borligi, ahvoli o‘ta og‘ir darajada ekanligi qayd etilgan. Mazkur holat yuzasidan Shahrisabz tuman prokuraturasi tomonidan fuqaroga nisbatan Jinoyat kodeksining 25,97-moddasi 2-qismi “d” va “l” bandlari (bezorilik oqibatida, boshqa shaxslarning hayoti uchun xavfli bo‘lgan usulda qasddan odam o‘ldirish) bilan jinoyat ishi qo‘zg‘atilib, Jinoyat protsessual kodeksining 221-moddasi tartibida ushlangan. Tergov harakatlari olib borilmoqda, — deyiladi Bosh prokuratura axborotida.
Izoh (0)