Jizzaxda ingliz tili o‘qituvchisi uyga vazifani bajarmagan 1-sinf o‘quvchilariga stul ko‘tartirib qo‘ydi

Bolalar ombudsmani Jizzax viloyatidagi maktabda tahsil olayotgan 1-sinf o‘quvchilariga stul ko‘tartirib qo‘yilishi yuzasidan ma’lumot berdi.

Aniqlanishicha, 22-aprel kuni Zarbdor tumanidagi 5-sonli umumtaʼlim maktabda 1-“A” sinfga o‘tilayotgan ingliz tili darsida o‘qituvchi R.T. (1999-yilda tug‘ilgan) o‘quvchilardan uyga berilgan vazifalarni so‘ragan. Olti nafar o‘g‘il va yetti nafar qiz bolani darsga tayyorgarlik ko‘rmasdan kelgani tufayli go‘yoki tarbiyaviy chora deb sinf xonasidagi o‘zlari o‘tirgan stullarni ko‘tarishga majbur qilgan.

Ushbu holatni o‘zining telefon apparatida video tasvirga olib, Telegram ijtimoiy tarmog‘i orqali shu maktabning ota-onalar guruhiga yuborgan.

Hozirda mazkur holat yuzasidan Zarbdor tumani IIB tomonidan tergovga qadar tekshiruv harakatlari olib borilmoqda.

Bolalarga nisbatan turli shakldagi zo‘ravonlik yoki zo‘ravonlikka tayangan tarbiya choralarini, jumladan, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash qonunan taqiqlangan va tegishli javobgarlikka asos bo‘ladi. Bolalar ombudsmani bu holat bo‘yicha bolalar manfaatlari yuzasidan o‘z kuzatuvini davom ettiradi, — deyiladi xabarda.

Avvalroq Buxoro viloyatida 15 yashar qiz sog‘lom bo‘lsa-da, ruhiy-asab kasalliklar dispanseridan olib ketilmayotgani aytilgandi. Shuningdek, samarqandlik qiz bolalar ombudsmaniga murojaat qilib, Qashqadaryodagi xonadonlarning birida ayol uni fohishalikka majburlaganini ma’lum qilgan edi.