Qarshi tumani prokuraturasi tergovchisi pora bilan ushlandi. Bu haqda Bosh prokuratura matbuot xizmati rahbari Hayot Shamsutdinov “Daryo”ga ma’lum qildi.
Qayd etilishicha, 8-aprel kuni soat 16:10 larda Qashqadaryo viloyati prokuraturasi DXX viloyat boshqarmasi xodimlari bilan hamkorlikda tezkor tadbir o‘tkazgan. Tadbirda Qarshi tumani prokuraturasi tergovchisi ish yurituvidagi jinoyat ishi bo‘yicha aybdor shaxsga nisbatan yengillik qilib berish evaziga 5 ming dollarni olgan vaqtida ushlangan.
Mazkur holat yuzasidan jinoyat ishi qo‘zg‘atilib, gumonlanuvchi protsessual tartibda ushlangan. Tergov harakatlari olib borilmoqda.
Fevral o‘rtalarida Buxoro viloyatining Kogon tumani prokurori 90 ming dollar pora bilan qo‘lga tushgandi. U viloyat prokuraturasi ish yurituvida bo‘lgan “Kogon yog‘ ekstraksiya zavodi” AJ mansabdor shaxslariga nisbatan jinoyat ishi bo‘yicha qidiruvda bo‘lgan jamiyat ta’sischisi M.I.ga nisbatan qo‘llanilgan qamoq ehtiyot chorasini o‘zgartirib, unga yengillik berishni va’da qilgan.
Izoh (0)