Toshkent shahar Ichki ishlar boshqarmasi Suriyadagi terrorchilar safiga qo‘shilgan fuqaro xalqaro qidiruvga berilganini ma’lum qildi.
Qayd etilishicha, 1970-yilda Tojikistonning Qo‘rg‘ontepa shahrida tug‘ilgan Alisher Tojiboyev ishlab, pul topish maqsadida Rossiyaning Moskva shahriga borib-kelib yurgan. Shu orada qurilish ishlarida ishlab yurib, 2004-yilda chechen millatiga mansub Islom ismli shaxsning diniy ekstremistik oqim g‘oyalari ta’siriga tushgan va o‘zi boshchiligida Moskva jamoatini tashkil qilgan.
Tojiboyev 2008-yilda Moskvada “Halol” nomli tamaddixona ochgan. Ishlab, pul topish maqsadida borgan tanishlarini ishga olib, bu yerda ularning miyasini diniy ekstremistik oqim g‘oyalari bilan zaharlab, jamoatini kengaytirgan.
Unga nisbatan 2012-yilda Jinoyat kodeksining 244-prim 2-moddasi (diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) 1-qismi bilan jinoyat ishi qo‘zg‘atilgan. Alisher Tojiboyev tergovdan yashiringan.
Hozirda maxsus qidiruvda bo‘lgan Tojiboyev 2013-yilda Moskva orqali Turkiyaga, u yerdan Suriyaga o‘tgan. Hozirda u Suriyadagi xalqaro terroristik guruhlar safida.
Suriyada terrorchi guruhlarga qo‘shilgan yana bir qator o‘zbekistonliklar, xususan, Abduvahob Abdurahimov, Jaloliddin Mansurov, Mirolim O‘lmasov, Erkin Qodirov ham qidiruvga berilgan.
Izoh (0)