Navoiy viloyati Navbahor tumanida ayol yangi tug‘ilgan chaqalog‘ini 10 million so‘mga sotmoqchi bo‘ldi. Bu haqda viloyat IIB xabar berdi.
Ma’lum qilinishicha, Navbahor tumanida yashovchi K.R. hali chillasi chiqmagan chaqalog‘ini 10 million so‘mga baholagan. Holat DXX viloyat boshqarmasi hamda tuman IIB xodimlari ishtirokida o‘tkazilgan tezkor tadbir davomida aniqlangan.
K.R. chaqalog‘ini qo‘shni mahalladagi Z.S.ga 10 million so‘mga sotayotgan paytda ashyoviy dalillar bilan qo‘lga olindi. Ayolga nisbatan Jinoyat kodeksining 135-moddasi 3-qismi bilan jinoyat ishi qo‘zg‘atilib, tergov harakatlari olib borilmoqda.
Bundan oldin Toshkent viloyatida bir yoshli o‘g‘lini 9 ming dollarga sotishga uringan er-xotinga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani hamda Navoiyda farzandini 85 million so‘mga sotishga uringan er-xotin jinoyat ustida qo‘lga olingani haqida xabar berilgandi.
Izoh (0)