Qirg‘iziston va O‘zbekiston 600 million kub metr suvni Qozog‘istonga yo‘naltiradi. Bu haqda Qozog‘iston bosh vaziri o‘rinbosari Qanat Bozumbayev xabar berdi.

Bozumbayevning so‘zlariga ko‘ra, butun Markaziy Osiyoda bu yil qurg‘oqchil keldi. Turkiston va Qizilo‘rda viloyatlarini suv bilan ta’minlovchi Sirdaryoning asosiy o‘zaniga odatdagidan 30–40 foiz kam suv kelmoqda. Anomal issiqlik tufayli dehqonchilik ehtiyojlari ortgan, ammo mavjud suv hajmi yetarli emas.
Qozog‘iston bosh vaziri Oljas Bektenov Qirg‘iziston va O‘zbekiston vakillari bilan suv tanqisligini bartaraf etish masalasini muhokama qilgan.
O‘tgan hafta ular (O‘zbekiston va Qirg‘iziston) bizga suv yetkazish jadvalidan bir milliard kub metrdan ortiq ortda qoldi. Kelishuvga muvofiq, shu haftadan boshlab keyingi ikki hafta ichida hududimizga 600 million kub metrga yaqin suv yo‘naltiriladi. Bizda vegetatsiya davri avgust oyida yakunlanadi. Vaziyatning keskinligiga qaramay, bu davrni talafotlarsiz o‘tkazishga harakat qilamiz.
Shaxsan o‘zim Turkiston viloyatini aylanib chiqdim, ko‘plab tumanlarda, suv omborlarida bo‘ldim, fermerlar bilan uchrashuvlar o‘tkazdim. Sug‘orish suvidan foydalanadigan deyarli barcha tumanlarni aylanib chiqdim, Qizilo‘rda viloyatini ham ko‘zdan kechirdim. Vaziyat murakkab, ammo bundan ham og‘irroq yillar bo‘lgan, dedi Bozumbayev.
Uning so‘zlariga ko‘ra, hosil sug‘orish suvi bilan ta’minlanishi nuqtayi nazaridan muammo bo‘lmaydi.
Izoh (0)