O‘zbekistonga tijorat maqsadida kelgan xorijliklar soni 3,4 barobarga oshdi.
Milliy statistika qo‘mitasi ma’lumotlariga ko‘ra, 2025-yilning yanvar-iyun oylarida jami 223,6 ming nafar chet el fuqarolari tijorat maqsadida O‘zbekistonga tashrif buyurgan. Bu ko‘rsatkich o‘tgan yilning mos davri bilan solishtirilganda 158,6 ming nafarga yoki 3,4 barobarga ko‘p.
Joriy yilning 6 oyida O‘zbekistonga tijorat maqsadida kelgan chet el fuqarolari mamlakatlar bo‘yicha quyidagicha:
- Afg‘oniston — 207 536 nafar;
- Tojikiston — 12 244 nafar;
- Turkmaniston — 1 642 nafar;
- Rossiya — 451 nafar;
- Turkiya — 276 nafar;
- Qozog‘iston — 255 nafar;
- boshqa davlatlar — 1 177 nafar.
Bundan ko‘rinadiki, 6 oyda tijorat maqsadida kelgan chet el fuqarolari orasida afg‘onistonliklar ulushi eng ko‘p — 92,7 foizni tashkil etdi. 2024-yilning yanvar-iyun oylarida 1569 nafar afg‘onistonlik tijorat uchun O‘zbekistonga kelgandi. Bu ko‘rsatkichlar taqqoslansa, afg‘onistonlik tadbirkorlarning O‘zbekistonga kelishi 132 barobar oshdi.
Avgust oyining boshlarida Afg‘oniston va O‘zbekiston xususiy sektorlari o‘rtasidagi qo‘shma ishbilarmonlik uchrashuvida umumiy qiymati 20 million dollardan ortiq bo‘lgan 45 ta savdo hamkorlik memorandumi imzolandi. Afg‘oniston sanoat va savdo vaziri vazifasini bajaruvchi Nuruddin Azizi Afg‘oniston va Markaziy Osiyo mamlakatlari, xususan, O‘zbekiston o‘rtasidagi savdo-iqtisodiy aloqalar tarixda kamdan-kam uchraydigan misli ko‘rilmagan darajaga yetganini aytgandi.
O‘zbekiston va Afg‘onistonning o‘zaro savdo hajmini 3 milliard dollarga yetkazish bo‘yicha aniq chora-tadbirlar belgilangan. 2024-yil oktyabridan ikki mamlakat o‘rtasida imtiyozli savdo kelishuv bitimi ishga tushgan. Bitim doirasida kelishilgan qator mahsulotlarga, shu jumladan, Afg‘onistonda qishloq xo‘jaligi mahsulotlari, gilamlarga, ayrim qurilish materiallariga import bojlari bekor qilingan. 2024-yilning avgustida “Termiz” xalqaro savdo markazi ochilgan.
Izoh (0)