Ijtimoiy tarmoqlarda Surxondaryo viloyati YPX xodimlarining o‘zaro janjallashgan holatlari aks etgan video tarqalgan edi. Videoda ko‘rinishicha, YPXB komandirining xizmat bo‘yicha o‘rinbosari mayor Baxtiyor Izbosarov va 1-safarbarlik guruhi inspektori safdor Jalol Abdurahmonov bilan o‘zaro tortishib ketgan.
Mayor Baxtiyor Izbosarov: Kecha sizga ham aytdim-a, onasini emsin, maxsus guruh ham ishlamadi. Men birinchi guruhga zorini qilyapman, na bir chorrahani tutadi, na bir “detskiy bolnitsa”, na bir boshqa-boshqa. Mayli, inobatga olib qo‘yyapman, gapiryapman qo‘yyapman, indamay, eshitib-ko‘rib yuribman. Men ham jinni emasman. Kecha e’tirozimni bildirdim Abdurahmonov Jalol degan bola to‘g‘risida. 6 ta Damas’ni ko‘rib o‘tiribdi, siljish yo‘q. Oxiri o‘zingiz ham meni ko‘rib gapirvordingiz-a? Iltimos, asabimni o‘ynamanglarey!
Safdor Jalol Abdurahmonov: Nima qilamiz bitta “GAI”?
Mayor Baxtiyor Izbosarov: (So‘kinib) nima bidirlaysan, nima bidirlaysan?
Safdor Jalol Abdurahmonov: Nima qilaylik? Nima deyapman?
Shundan so‘ng mayor Baxtiyor Izbosarov safdor Jalol Abdurahmonovga so‘kinib gapira boshlaydi, u esa so‘kinmasligini so‘raydi. Baxtiyor Izbosarov kelib, Jalol Abdurahmonovni yelkasi bilan itarib yuboradi. U yerda hozir bo‘lgan boshqa xodimlarni ularni ajratib qo‘yadi.
Mayor unga gap qaytargan safdordan “znachok” va guvohnomasini berishini so‘raydi. Safdor xodim esa uni pogonini yulgani uchun mayor javob berishini aytadi.
Video davomida mayor Baxtiyor Izbosarov shaxsiy tarkibga qonunbuzarliklarni aniqlash bo‘yicha reja topshirgan audiosi qayd etilgan
Bir inspektor o‘sha 135 (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) va boshqa qoidabuzarliklar bo‘yicha uchtadan ziyod bo‘lishi kerak. Uchtadan kam bo‘lishi kerak emas, qarzdorlik bo‘yicha ham xuddi shunday. Eng kamida 3 ta bo‘lishi kerak, undan kam bo‘lishi kerak emas. Undan ziyodini qilsalaring, o‘zlaring uchun qilaveringlar, faqat 3 tadan kam bo‘lmasligi kerak
Shuni hisobiga inspektor bir kun davomida 6 ta transport vositasini jarima maydonchasiga kiritishi kerak, eng kamida, deydi mayor Baxtiyor Izbosarov.
Mazkur holat yuzasidan Surxondaryo viloyati IIB JXX YHXB axborot xizmati izoh berdi. Aytilishicha, voqea bir yil avval, ya’ni 2023-yilning 29-avgust kuni sodir bo‘lgan.
Surxondaryo viloyati IIB JXX YHXB saf maydonida YPX xodimlari bilan o‘tkazilgan xizmatoldi yo‘riqnomasi vaqtida YPXB komandirining xizmat bo‘yicha o‘rinbosari mayor Baxtiyor Izbosarovning 1-safarbarlik guruhi inspektori safdor Jalol Abdurahmonov bilan o‘zaro tortishuvli holati yuzasidan viloyat IIB mas’ullari tomonidan o‘rnatilgan tartibda xizmat tekshiruvi o‘tkazilganligini ma’lum qilamiz, deyiladi munosabatda.
Munosabatda xizmat tekshiruvi natijalari haqida aytilmagan. Surxondaryo viloyati IIB JXX YHXB Axborot xizmati “Daryo”ga bildirishicha, YPXB komandirining xizmat bo‘yicha o‘rinbosari mayor Baxtiyor Izbosarovga tanbeh intizomiy chora qo‘llanilgan.
Izoh (0)