Taksi haydovchisi yo‘lovchiga, mast erkak esa tanishiga shilqimlik qilgani uchun qamaldi

Toshkent shahrida taksi haydovchisi yo‘lovchiga, Xorazmda esa erkak tanishiga shilqimlik qilgani uchun javobgar qilindi. “Daryo” shu haqdagi sud hujjatlari bilan tanishdi.

Maʼlum bo‘lishicha, 1998-yilda tug‘ilgan fuqaro 2025-yilning 29-iyun kuni boshqaruvidagi Onix’da Toshkent viloyatining Zangiota tumanida yashovchi ayolga taksi xizmatini ko‘rsatayotgan paytda uning yuz qismi va tanasining ko‘krak oldi qismiga qo‘llarini tekkizib, shahvoniy shilqimlik qilgan.

Sud majlisida huquqbuzar tariqasida so‘roq qilingan 27 yoshli erkak haqiqatdan ham ayol yo‘lovchiga xizmat ko‘rsatganini, ammo unga shilqimlik qilmaganini aytdi. Jabrlanuvchi ayol esa sudlanuvchi o‘zini oqlash uchun yolg‘on ko‘rsatma berayotganini, aslida yo‘lda ketayotganida erkak uning yuzini ushlab, tanasining ko‘krak qismiga tegib, shahvoniy shilqimlik qilganini gapirib berdi va unga qonuniy jazo berilishini so‘radi.

Shunga o‘xshash holat Xorazm viloyatining Urganch shahrida ham ro‘y bergan.

Urganch shahrida yashovchi 38 yoshli erkak tanishining uyiga mast holda borib, uning uyiga mehmon bo‘lib kelgan avvaldan tanish qo‘shni ayolga shilqimlik qilgan. Unga buning uchun 1 million so‘m pul taklif qilib, qo‘llaridan ushlay boshlagan. Ayol unga “qo‘llaringni tort deya” ko‘chaga chiqqanida ortidan chiqib, ko‘chada ayolni har xil uyatli so‘zlar bilan haqorat qilgan.

Sud Toshkent shahrida yashovchi haydovchini Maʼmuriy javobgarlik to‘g‘risidagi kodeksning 41-1-moddasi 1-qismi (shahvoniy shilqimlik qilish, yaʼni shaxsga nisbatan uning uchun nomaqbul bo‘lgan hamda uning shaʼni va qadr-qimmatini tahqirlaydigan, shaxsning tashqi qiyofasini yoki qaddi-qomatini tavsiflashda, imo-ishora qilishda, teginishda, chaqirishda ifodalangan, shahvoniy xususiyatga ega bo‘lgan harakatlarni bir marta qo‘pol ravishda yoki bir necha marta sodir etish) bilan aybdor deb topgan bo‘lsa, Xorazmda yashovchi fuqaroni shahvoniy shilqimlik qilish bilan birga mayda bezorlikni ham amalga oshirgan degan xulosaga keldi. Natijada taksi haydovchisi 5 sutkaga, xorazmlik mast erkak esa 7 sutka qamaldi.