AQSH vitse-prezidenti Jey Di Vens Vashington Falastin davlatini tan olishni rejalashtirmayotganini ta’kidladi. Bu haqda u 8-avgust kuni Buyuk Britaniya tashqi ishlar vaziri Devid Lemmi bilan uchrashuv chog‘ida ma’lum qildi.
Britaniya jurnalistlarining savollariga javob berar ekan, Vens Londonning sentyabr oyida Falastinni davlat sifatida tan olish rejasiga shunday munosabat bildirgan:
“G‘azoda funksional hukumat yo‘qligi bois, bunday tan olish nimani anglatishini tushunmayapman. Agar Yaqin Sharqda tinchlik o‘rnatish oson bo‘lganida, bu ish allaqachon bajarilgan bo‘lardi”.
Jurnalistlar Vensdan Isroilning G‘azo shahrini egallash rejalari haqida Tramp oldindan xabardor qilinganmi, deb so‘ragan. Vitse-prezident esa bu borada izoh bermasligini ta’kidlagan.
London va Vashington o‘rtasida bir nechta bahsli masalalar mavjud
Uchrashuvda AQSH va Britaniya o‘rtasida ikki asosiy global mavzu — Rossiya—Ukraina urushi hamda Isroil va HAMAS o‘rtasidagi ziddiyat bo‘yicha yondashuvlar farqlanayotgani ayon bo‘lgan. Shu bilan birga, Britaniya tomonidan po‘lat va alyuminiy eksporti bo‘yicha Vashington bilan savdo muzokaralari davom etmoqda.
Putin—Tramp uchrashuvi va Ukraina
Rossiya prezidenti Vladimir Putin 7-avgust kuni Tramp bilan kelasi hafta uchrashishga umid qilayotganini ma’lum qilingandi. So‘ngra ular o‘rtasida Alyaskada 15-avgust kuni yuzma-yuz uchrashuv bo‘lishi e’lon qilingandi. Tramp, asosan, Putin bilan bevosita muzokaralarga urg‘u berayotgan bo‘lsa, Britaniya bosh vaziri Kir Starmer va boshqa Yevropa yetakchilari urushni to‘xtatish muzokaralariga Ukraina ham bevosita jalb qilinishi shart deb hisoblaydi.
Jey Di Vens va Devid Lemmi: siyosiy qarama-qarshiliklarga qaramay do‘stona aloqalar
Jey Di Vens va Devid Lemmi — turli siyosiy qarashlarga ega bo‘lsa-da (Vens — Tramp tarafdori bo‘lgan konservativ respublikachi, Lemmi — mehnatkash sinf vakili bo‘lgan leyborist), ular shaxsiy jihatdan yaqin munosabat o‘rnatishga muvaffaq bo‘lgan.
Lemmi The Guardian nashriga bergan intervyusida shunday degan:
“Ikkalamiz ham qiyin bolalik davrini boshdan kechirganmiz. Vens menga va Angela Reynerga juda yaqin inson sifatida munosabatda bo‘ladi”.
Eslatib o‘tamiz, Lemmi 2025-yil boshida Vashingtonda Vensning uyiga tashrif buyurgan. Keyinchalik ular may oyida Rimda Papasi Lev XIV’ning inauguratsiyasi chog‘ida yana uchrashgan.
Izoh (0)