Prezident Shavkat Mirziyoyev bu gal ozgina omad yetishmagan bo‘lsa-da, vatan sharafini bor kuch-g‘ayrati bilan himoya qilgan, qizg‘in bellashuvlarda katta tajriba orttirgan sportchilar – para dzyudochilar Turg‘un Abdiyev, Uljon Amriyeva, Shohruh Mamedov, Feruza Ergasheva va para kanoechi Shahzoda Mamadaliyevani ham samimiy tabriklab, kelgusi musobaqalarda ularning barchasiga zafar yor bo‘lishini tiladi.
“Chindan ham, bu hayotda ko‘p narsani hal qiladigan omil – bu yuksak iroda va matonatdir. Lekin odamning qalbiga mana shunday iroda va matonatni singdirish, uni tarbiyalab, kamolga yetkazish – bu albatta oson ish emas. Ochiq aytish kerakki, bunday jasorat hammaning ham qo‘lidan kelmaydi. O‘z oldingizga qo‘ygan maqsadga erishish yo‘lida sizlarning boshqalarga qaraganda o‘n marta, balki yuz marta ko‘proq mehnat qilishingizga, mashaqqat chekishingizga to‘g‘ri kelganini ham men yaxshi anglayman.
Mana shunday murakkab damlarda sizlarning yuragingizga umid va ishonch, qatʼiyat va jasorat tuyg‘usini bag‘ishlagan, sizlar bilan yonma-yon turib, sizlarni doimo qo‘llab-quvvatlab, zafarli marralar sari ruhlantirgan fidoyi insonlar bor. Bular – avvalo sizlarning mehribon ota-onalaringiz, yaqinlaringiz, jigarlaringizdir. Sizlar erishgan g‘alabalarda ularning ham albatta munosib hissalari bor”, dedi prezident.
Davlat rahbari qahramon sportchilarning qahramon ota-onalari, oila aʼzolarini ham olqishlab, ularga eng ezgu tilaklari va hurmatini bildirdi.
Tadbirda mohir va jonkuyar murabbiylarga, barcha mutasaddi va mutaxassislarga ham minnatdorlik bildirildi.
Ayniqsa, para yengil atletika bo‘yicha tajribali trenerlar – Ibrohimjon Yusupov, Yahyobek Yaqubov, Sardor Xudayberganov, Grigoriy Kamulya, Azizjon Normatov, Rahmonberdi Xo‘jamov, Galina Kazakovaga, para dzyudo bo‘yicha mohir murabbiylar – Mahmud Omonov, Muratboy Dusumbetov, Alfiya Ibragimova, Fozil Karamatov va para taekvondo bo‘yicha taniqli murabbiy Bobur Qo‘ziyevga, pauerlifting bo‘yicha tajribali ustozlar – Fazliddin Umirzoqov, para suzish bo‘yicha Ravshanbek Amilov va o‘q otish bo‘yicha Natalya Yefimovaga, shuningdek, psixolog mutaxassis Lola Agzamovaga alohida tashakkur izhor etildi.
“Bugun bir haqiqatni to‘la ishonch bilan ayta olamiz: Yangi O‘zbekistonning o‘z matonat maktabi, shon-sharaf maktabi bor. Bu maktabning chinakam bunyodkorlari sizlar, desak, buyam ayni haqiqat bo‘ladi”, dedi Shavkat Mirziyoyev.
Mamlakatda sport va jismoniy tarbiya sohasini, paralimpiya harakatini ravnaq toptirishga berilayotgan eʼtibor, imkoniyati cheklangan shaxslarni qo‘llab-quvvatlash, ularga inklyuziv sharoit yaratish bo‘yicha ulkan ishlar amalga oshirilayotgani qayd etildi.
O‘tgan yildan boshlab Ijtimoiy himoya milliy agentligi faoliyat boshlagan. Adaptiv sportni rivojlantirish hamda nogironligi bo‘lgan shaxslarni sportning ushbu yo‘nalishiga jalb etish maqsadida Adaptiv sport turlari assotsiatsiyasi tashkil qilindi.
Prezident Parij maydonlarida erishilgan tarixiy g‘alabalarda ularning ham munosib hissasi borligini qayd etib, Ijtimoiy himoya milliy agentligi, Adaptiv sport turlari assotsiatsiyasi hamda barcha sport federatsiyalari rahbarlari va faollariga ham samimiy minnatdorlik bildirdi.
Izoh (0)