Prezident Shavkat Mirziyoyevning Paralimpiya o‘yinlari ishtirokchilari bilan bo‘lib o‘tayotgan uchrashuvida Tokio Paralimpiya o‘yinlaridan so‘ng keyingi safar, albatta, kuchli “o‘n beshtalikka” kiramiz, deb ezgu niyat qilingani esga olindi.
O‘tgan yillar davomida shu maqsad yo‘lida tinimsiz mehnat qilindi. Sportchilarimiz uchun barcha zarur sharoitlar yaratilib, yuksak marralar uchun puxta zamin tayyorlandi. Natijada O‘zbekiston bu yilgi Paralimpiya o‘yinlarida birinchi marta eng ko‘p tarkib bilan, yaʼni 9 ta sport turi bo‘yicha 65 nafar sportchi bilan ishtirok etdi. Ayniqsa, para velosport bo‘yicha vakillarimiz ushbu musobaqalarda ilk bor qatnashdi.
“Albatta, Paralimpiyadada erishilgan har bir yutuq, har bir natija beqiyos ahamiyatga ega. Chunki to‘rt yilda bir marta o‘tadigan bunday yirik xalqaro musobaqa orqali dunyo hamjamiyati har bir qatnashchi mamlakatda insonning jismoniy va maʼnaviy salohiyatini ro‘yobga chiqarishga qanday eʼtibor qaratilayotganiga baho beradi. Shu bois, sizlar tarixiy yutuqlaringiz bilan O‘zbekiston shaʼnini, yurtimiz nufuzini yuksak bosqichga olib chiqdingiz, desak, haqiqatni aytgan bo‘lamiz”, dedi prezident.
Davlat rahbari o‘yinlarda erishilgan rekord natijalarga urg‘u berdi.
Afsonaviy sportchi Husniddin Norbekov mamlakatimiz tarixida birinchi marta uch karra Paralimpiya chempioni bo‘lgani, shu bilan birga yangi rekord o‘rnatgani alohida taʼkidlandi. Pahlavon o‘g‘lonlarimiz Bobirjon Omonov va Sherzod Namozov yadro uloqtirish va dzyudo bo‘yicha ikkinchi bor oltin medallarni qo‘lga kiritdi. Bobirjon esa paralimpiya rekordini ham yangiladi.
“Ayni vaqtda yuksak matonatli qizlarimiz ham O‘zbekiston g‘alabasiga munosib hissa qo‘shganlari to‘g‘risida har qancha g‘urur va iftixor bilan gapirsak arziydi, albatta. Jamoamiz qo‘lga kiritgan medallarning 11 tasi aynan qizlarimiz hisobiga yozilgani ham bu fikrni yaqqol tasdiqlaydi”, dedi davlat rahbari.
Asila Mirzayorova uzunlikka sakrash, Nurxon Qurbonova esa nayza uloqtirish bo‘yicha Paralimpiya chempionlari bo‘lgani qatorida jahon miqyosidagi rekordlarni ham yangilaganiga qoyil qolmaslikning iloji yo‘q. 15 yashar Shahinaxon Yigitaliyeva kumush medalni qo‘lga kiritib, Paralimpiya o‘yinlaridagi eng yosh sovrindor sifatida tarixga kirgani ham alohida taʼkidlandi.
Mohir sportchimiz Tolibboy Yo‘ldoshev ham biryo‘la ikkita marrani zabt etgani, ikki karra paralimpiya chempioni Yorqinbek Odilov nayza uloqtirish bo‘yicha Osiyo rekordini yangilagani qayd etildi.
Prezident Qudratilloxon Maʼrufxo‘jayev, Elbek Sultonov, Asadbek Toshtemirov, Sherzod Namozov kabi o‘g‘lonlarimizni ham oltin medallar bilan yana bir bor chin yurakdan qutladi.
Po‘lat irodali qizimiz Ro‘za Qo‘ziyeva pauerlifting bo‘yicha kumush medalni qo‘lga kiritgani, aslida bu oltinga teng g‘alaba ekanini butun dunyo tan olgani taʼkidlandi.
Izoh (0)