Avgust oyida Samarqanddagi “Omonqo‘ton” milliy tabiat bog‘iga noqonuniy kirgan 5 kishi daraxtlar va o‘simliklarga zarar yetkazgani haqida xabar berilgandi. Ekologiya, atrof-muhitni muhofaza qilish va iqlim o‘zgarishi vazirligining maʼlum qilishicha, holat tezkor ishchi guruhi tomonidan o‘rganildi.
Natijada qonunbuzarlar tomonidan bog‘ hududida texnikalar yordamida tekislash, kovlash ishlari olib borilganligi va “Omonqo‘ton” milliy tabiat bog‘iga tegishli bo‘lgan 869 m/kv maydonda “Taxti Qoracha” dovoni bilan bog‘lovchi yo‘l hosil qilinganligi maʼlum bo‘ldi. Buning oqibatida yo‘lda mavjud bo‘lgan 7 turdagi jami 64 tup daraxt va butalarga zarar yetkazilgan.
Shundan 27 tup daraxt va butalar tag qismidan kesilgan yoki qo‘porib olingan, qolgan 37 tup daraxt va butalar esa o‘smaydigan darajada shikastlangan. O‘simlik dunyosiga 67 mln 726 ming so‘m miqdorda zarar yetkazilgan.
Bundan tashqari, hududda olib borilgan yo‘l solish ishlari natijasida jami 2296 m/kv yer maydonida mavjud “Qizil kitob”ga kiritilgan, kamyob, kamayib borayotgan va noyob tur hisoblangan 12 turdagi 2 ming 591 tup o‘simlik payhon qilinib, tabiatga 1 mlrd 48 mln so‘m miqdorida zarar yetkazilgan. Umumiy hisobda tabiatga yetkazilgan zarar miqdori 1 mlrd 115 mln so‘mni tashkil etmoqda.
Ish yuzasidan to‘plangan hujjatlar tegishli chora ko‘rish maqsadida Bosh prokuraturaga yuborilgan.
Izoh (0)