Sirdaryoda chiqindi tashish xizmati aholidan 500 mln so‘mdan ortiq ortiqcha to‘lov olgani aniqlandi

Sirdaryo viloyati “Toza hudud” davlat unitar korxonasi ko‘rsatilmagan xizmat uchun aholiga 528,6 million so‘m ortiqcha to‘lov hisoblagani aniqlandi. Bu haqda Raqobatni rivojlantirish va iste’molchilar huquqlarini himoya qilish qo‘mitasi xabar berdi.

Qo‘mitaning Sirdaryo viloyati hududiy boshqarmasi tomonidan Sirdaryo viloyati “Toza hudud” davlat unitar korxonasining 2023 va 2024-yilning 1-yarim yilligida maishiy chiqindi tashish xizmatlarini ko‘rsatish sohasida qonunchilik talablariga rioya etilishi yuzasidan o‘rganish va tahlil ishlari olib borilganda uning tuman-shahar filiallari tomonidan maishiy chiqindi tashish xizmatining MFY kesimida belgilangan jadval asosida xizmat ko‘rsatmayotgani, buning natijasida aholidan ortiqcha mablag‘lar olinganlik holatlari aniqlangan.

Jumladan, “Toza hudud” DUK Guliston tuman filiali tomonidan tumandagi 3 ta MFYda 9 158 nafar aholidan ko‘rsatilmagan xizmat uchun jami 46,1 million so‘m ortiqcha to‘lovlar hisoblangani ma’lum bo‘ldi.

Xuddi shu kabi quyidagi hududlarda ham ortiqcha mablag‘lar olingan:

• 12 ta MFYda (Oqoltin tumanida 32 329 nafar aholi) — 76,9 million so‘m;
• 9 ta MFYda (Boyovut tumanida 27 949 nafar aholi) — 95,6 million so‘m;
• 9 ta MFYda (Xovos tumanida 17 307 nafar aholi) — 73,1 million so‘m;
• 7 ta MFYda (Sirdaryo tumanida 19 833 nafar aholi) — 67,3 million so‘m;
• 3 ta MFYda (Yangiyer shahrida 14 464 nafar aholi) — 86,3 million so‘m;
• 3 ta MFYda (Sardoba tumanida 8 984 nafar aholi) — 5,2 million so‘m;
• 3 ta MFYda (Shirin shahrida 7 620 nafar aholi) — 33,2 million so‘m;
• 1 ta MFYda (Mirzaobod tumanida 4 148 nafar aholi) — 31,1 million so‘m;
• 1 ta MFYda (Sayxunobod tumanida 3 069 nafar aholi) — 13,6 million so‘m;

Umumiy hisob-kitoblarga ko‘ra “Toza hudud” tomonidan jami 51 ta MFYda 144 861 nafar iste’molchiga nisbatan 528,6 million so‘m miqdorida ortiqcha to‘lovlar hisoblagani aniqlandi.

Yuqoridagilardan kelib chiqib, hududiy boshqarmaning maxsus komissiyasi tomonidan “Toza hudud” DUKka nisbatan “Iste’molchilar huquqlarini himoya qilish to‘g‘risida”gi qonunning 21-moddasi sotuvchi (ijrochi) iste’molchini haq evaziga qo‘shimcha tovarlar sotib olishga yoki qo‘shimcha xizmatlardan foydalanishga qistashga, shuningdek ko‘rsatilmagan xizmatlar uchun haq olishga haqli emas) talablari buzilgani yuzasidan, tegishli tartibda ish qo‘zg‘atildi, ishni ko‘rib chiqish natijasida 144 861 nafar iste’molchi foydasiga 528,6 million so‘m mablag‘ qayta hisob-kitob qilinishi bo‘yicha bajarilishi majburiy bo‘lgan ko‘rsatma berildi.