UFC’ning ikki vazn toifasi sobiq chempioni Konor Makgregor 2025-yil noyabr oyida bo‘lib o‘tadigan Irlandiya prezidentlik saylovida o‘z nomzodini qo‘yishi mumkin. Sportchi bu borada ijtimoiy tarmoqlardagi sahifasi orqali xalqqa murojaat qilib, ularni o‘zini qo‘llab-quvvatlashga chaqirdi.
Makgregor o‘z bayonotida mamlakatga sodiqligini ta’kidlab, moliyaviy holati sababli unga bosim o‘tkazish yoki uni pul bilan sotib olishning iloji yo‘qligini aytdi:
Mening cheksiz boyligim, merosim va umuman barcha narsam Irlandiyada. Bu shuni anglatadiki, meni pul bilan sotib olishning imkoni yo‘q. Men poraxo‘r emasman. Terrorchilar bilan hech qanday aloqam yo‘q va doimiy bosimlarga bardosh bera olaman, — dedi Makgregor.
Shuningdek, u o‘zini mamlakatdagi muammolarga yechim sifatida ko‘rayotganini bildirgan:
Agar siz meni prezident etib saylasangiz, bu Irlandiya uchun eng to‘g‘ri qaror bo‘ladi. Men — barcha muammolarning davosiman. Kimdir meni to‘xtatmoqchi bo‘lsa, bilsin: men siz o‘ylaganingizdan ham kuchliman. Atrofimda kuchli jamoa jamlangan. Men bu poygada qatnashaman va g‘alaba qozonishga harakat qilaman. Faqat bir iltimosim bor, Konor Makgregorga ovoz bering.
Makgregor 2025-yil 17-mart kuni AQSh prezidenti Donald Tramp bilan Oq uyda uchrashgan. Bu uchrashuv uning siyosatga jiddiy kirishayotganining ishorasi sifatida baholanmoqda.
Ma’lumot o‘rnida, 37 yoshli Konor Makgregor professional faoliyati davomida 22 ta jang o‘tkazib, 16 ta g‘alaba va 6 ta mag‘lubiyat qayd etgan. U UFC tarixida ilk bor ikki vazn toifasida chempionlikni qo‘lga kiritgan sportchi sifatida nom qozongan.
Izoh (0)