Surxondaryo viloyati Muzrabot tumanida ayolga uning behayo videolarini tarqatib yuborish bilan tahdid qilib, pul talab qilgan erkak qo‘lga olindi. Bu haqda viloyat IIB matbuot xizmati xabar qildi.
Tegishli organ vakillari tomonidan Muzrabot tumanida o‘tkazilgan tezkor tadbirlarda 1986-yil ushbu tumanda tug‘ilgan fuqaro 1985-yilda Tojikiston Respublikasi Dushanbe shahrida tug‘ilgan, Rossiya Federatsiyasi fuqarosi bo‘lgan ayolning yalang‘och holatdagi videolarini qo‘lga kiritib, ayolni videolarni ijtimoiy tarmoqlarda tarqatib yuborish bilan qo‘rqitgan.
Ushbu shaxs ayoldan 1 000 AQSH dollari miqdorida pul talab qilgan. U pullarni jabrlanuvchining dugonasi, 1988-yil Sho‘rchi tumanida tug‘ilgan Termiz shahrida yashovchi fuqarodan talab qilingan pullardan 900 dollar va 1 mln 250 ming so‘m miqdoridagi mablag‘ni olgan vaqtida ashyoviy dalillar bilan qo‘lga tushdi.
Mazkur holat yuzasidan Termiz shahar IIB huzuridagi tergov bo‘limi tomonidan Jinoyat kodeksining 165-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Maʼlumot uchun, tovlamachilik jinoyatini sodir etganlik uchun uch yildan besh yilgacha ozodlikdan mahrum qilish jazosi tayinlanishi mumkin.
Izoh (0)