G‘azo sektoridagi vaziyatning rivojlanishi munosabati bilan Germaniya hukumati Isroilga nisbatan qurol eksportini qisman taqiqladi. Bu haqda bugun federal kansler Fridrix Merts ma’lum qildi.
Uning aytishicha, Germaniya “keyingi xabargacha G‘azo sektorida qo‘llanilishi mumkin bo‘lgan” qurol-yarog‘ eksportini ma’qullamaydi. Shu bilan birga, u “Isroil hukumati tomonidan tasdiqlangan Isroil armiyasining G‘azo sektoridagi yanada shiddatli harbiy harakatlarini” tilga olgan.
“Federal hukumat G‘azo sektoridagi tinch aholining davom etayotgan azob-uqubatlaridan chuqur tashvishda”, deydi Merts.
Rejalashtirilgan hujum munosabati bilan Isroil hukumati aholini ta’minlash borasida avvalgidan ham ko‘proq mas’uliyatga ega. Kanslerning fikricha, Isroil insonparvarlik yordamini, jumladan, BMT tashkilotlari va boshqa nodavlat tuzilmalar uchun to‘liq kirish imkoniyatini ta’minlashi lozim.
Qurol-yarog‘ yetkazib berishni to‘xtatish to‘g‘risidagi qarorni moliya vaziri va vitse-kansler Lars Klinbayl qo‘llab-quvvatlagan.
“G‘azodagi insonparvarlik azob-uqubatlari chidab bo‘lmas darajada. Isroil hukumati G‘azodagi insonparvarlik vaziyati uchun katta mas’uliyatga ega. Shu sababli, insonparvarlik yordami G‘azoga imkon qadar tezroq va to‘liq hajmda kiritilishi shart”, deydi Klinbayl.
Uning ta’kidlashicha, Germaniya Isroil davlati bilan to‘liq hamjihat, biroq uning xatolarini ham ochiq aytish kerak.
“Barcha garovga olinganlarni ozod qilish va o‘t ochishni to‘xtatish eng shoshilinch masala ekanligi ham shubhasiz”, deydi vazir.
Bundan avval Isroil bosh vaziri Binyamin Netanyaxu 4-avgust kuni G‘azo sektorini to‘liq bosib olish haqida qaror chiqargani xabar qilingandi. Bosh vazirga ko‘ra, HAMAS tomonidan garovga olingan yahudiy harbiylari joylashgan hududlarda ham harbiy operatsiyalar o‘tkazish rejalashtirilgan. Bu qaror Isroil mudofaa kuchlari bosh shtabi rahbari general-leytenant Eyal Zamirga yetkazilgan. Zamir qarorga rozi bo‘lmagan taqdirda uning iste’foga chiqishi bildirilgan.
Izoh (0)