Janubiy Koreyada Telegram kompaniyasi o‘smirlar suratlari asosida sun’iy intellekt tomonidan yaratilgan pornografik soxta ma’lumotlarni tarqatish bilan bog‘liq jinsiy jinoyatlarni sodir etishda sheriklikda gumon qilinmoqda.
Yonhap nashriga ko‘ra, politsiya rasmiy ayblovlarni tayyorlash maqsadida bu borada dastlabki tergovni boshlagan.
“Fransiyadagi kabi Seul shahar politsiyasi Telegram’ga nisbatan rasmiy ayblovlar qo‘yishdan oldin tergovni boshladi”, deydi Janubiy Koreyaning Jinoyat qidiruv milliy agentligi rahbari U Chon Su.
Uning so‘zlariga ko‘ra, gap jinoyatga sheriklik (soxta videolarni tarqatish) haqida bormoqda.
Shu bilan birga, Chon Su Telegram nafaqat Janubiy Koreyaga, balki boshqa mamlakatlar, xususan, AQSH milliy tergov organlariga ham tekshiruv uchun hech qanday maʼlumot, xususan hisoblar haqidagi maʼlumotlarni taqdim etmayotganini taʼkidlagan.
U, shuningdek, Seul Telegram’dagi tergovda Fransiya rasmiylari va turli xalqaro tashkilotlar bilan hamkorlik qilish niyatida ekanini aytgan.
30-avgust kuni Yonhap axborot agentligi Seul shahar politsiyasi agentligiga tayanib, Janubiy Koreyada 279 ta soxta pornografik video yaratishda gumon qilingan yigit o‘zining Telegram’dagi kanali foydalanuvchilari unga portret suratlari va tanishlarining tavsiflarini yuborganidan so‘ng qo‘lga olinganini yozgan.
Agentlikka ko‘ra, 246 nafar kishi Telegram’dagi mazkur jinoyat qurboni bo‘lgan. 22-avgust kuni gumonlanuvchi favqulodda hibsga olingan.
Qayd etilishicha, o‘tgan haftaning o‘zida Janubiy Koreya politsiyasiga pornografik soxta ma’lumotlarni tarqatish bo‘yicha 88 ta holat haqida xabar berilgan. Bu borada 24 nafar gumondor shaxs aniqlangan.
Izoh (0)