Meksika mamlakatdagi eng qudratli giyohvandlik kartellarida faoliyat yuritganlikda gumon qilingan 26 nafar mahbusni AQSHga ekstraditsiya qildi. Bu haqda BBC xabar berdi.
Ma’lum qilinishicha, bu 2025-yilda amalga oshirilgan ikkinchi yirik ekstraditsiya bo‘lmoqda. AQSH rasmiylari mahbuslarni yirik narkoto‘dalarning asosiy a’zolari ekanini bildirgan. Ular zo‘ravonlik jinoyatlari yoki uyushgan jinoyatchilik bilan aloqadorlikda ayblanmoqda. Meksika hukumati esa mahbuslarga jamoat xavfsizligiga doimiy tahdid sifatida qaramoqda.
Mahbuslar orasida “Jalisko yangi avlod” (CJNG) va “Sinaloa” karteli a’zolari borligi tasdiqlangan. Ularning orasida esa CJNG moliyaviy boshlig‘i, guruh yetakchisi El Mencho Oseguera Garsiyaning qudasi Abigael Gonsales Valensiya (“El Kuini”) ham borligi aytilmoqda. Shuningdek, Los-Anjeles okrugi sherif o‘rinbosarini o‘ldirishda gumon qilinayotgan Roberto Salazar ham AQSHga jo‘natilgan. Ekstraditsiya faqat o‘lim jazosi qo‘llanmaydigan shart asosida amalga oshirilgani ta’kidlanmoqda — bu Meksika hukumati yillar davomida qat’iy rioya qilib kelayotgan talablardan biridir.
So‘nggi masshtabli ekstraditsiya Vashingtonning kartellarga qarshi keskin choralar ko‘rish talablari fonida amalga oshirilmoqda. Meksika prezidenti Klaudiya Sheynbaum o‘tgan hafta AQSHning mamlakat hududida harbiy operatsiya o‘tkazishini rad etgan bo‘lsa-da, ushbu ekstraditsiya tashabbusi ikki davlatning fentanil savdosiga qarshi hamkorligi davom etayotganini ko‘rsatmoqda.
Ma’lumot o‘rnida, Meksika 2025-yil fevral oyida ham AQSHga kartellarga aloqador 29 mahbusni topshirgandi. Ular orasida 1985-yilda AQSH giyohvandlikka qarshi kurash agentligi xodimi Enrike Kiki Kamarenani o‘ldirishda ayblanayotgan “Gudalaxara” karteli asoschilaridan Karo Kintero ham bor edi.
Izoh (0)