Ijtimoiy tarmoqlarda ayol go‘dak bolani urayotgani aks etgan video tarqalgandi. Holat bolalar ombudsmani tomonidan o‘rganilganda holat 1 yil avval sodir bo‘lgani aniqlandi.
Olib borilgan tekshiruv natijalariga ko‘ra, Surxondaryo viloyati Sariosiyo tumanida yashovchi fuqaro T.M. (2001-yilda tug‘ilgan ayol) 2024-yilning may oyida sobiq turmush o‘rtog‘i A.Q. (1994-yilda tug‘ilgan erkak) bilan janjallashib, bola uchun aliment va boshqa moddiy ta’minot bermagani vaji bilan bolani otasiga bosim qilib qo‘rqitish maqsadida video qo‘ng‘iroq qilib, farzandi A.R (2023-yilda tug‘ilgan qiz) ni urib tasvirga olgan va uni sobiq turmush o‘rtog‘iga yuborgan.
Telefondagi yozishmalarda bolani o‘ldirish bilan tahdid qilgani haqidagi gaplarni ham o‘qish mumkin. “O‘zim tuqqanman, o‘zim o‘ldiraman”, deyilgan chaqaloq videosi yuborilgan yozishmada.
Tergovga qadar tekshiruvda bolaning sog‘lig‘iga zarar yetmagani aniqlangani sababli 2024-yil 14-mayda holat yuzasidan ayol Ma’muriy javobgalik to‘g‘risidagi kodeksning tegishli moddalari bilan huquqbuzarlik sodir qilgan deb topilib, Jinoyat ishlari bo‘yicha Sariosiyo tuman sudi tomonidan uning javobgarligi masalasi hal etilgan.
Qayd etilishicha, hozirda ayol sobiq turmush o‘rtog‘i va uning oila a’zolari bilan o‘zaro nizo vaziyatida bo‘lib, bu borada tergovga qadar tekshiruv harakatlari olib borilmoqda.
2025-yil boshlarida Toshkent viloyatida onasi tomonidan kaltaklangan 4 yoshli qiz vafot etgandi. Holat yuzasidan jinoyat ishi qo‘zg‘atilib, ayol qamoqqa olingan. 27-yanvar kuni Toshkent viloyatida qaynona-kelin janjali sabab chaqaloq kuyib qolgandi. Olmaliqda ayol shirinliklarni ruxsatsiz yegan bolasining tana a’zolariga paxta tiqib, yoqqani haqida ham xabar berilgandi.
2024-yil 14-noyabrda “Bolalarni zo‘ravonlikning barcha shakllaridan himoya qilish to‘g‘risida”gi qonun qabul qilingandi. Qonun 2025-yil 15-maydan kuchga kiradi. Unda bolalarni zo‘ravonlikning barcha shakllaridan himoya qilish bo‘yicha umumiy va individual chora-tadbirlar belgilab berilgan.
Izoh (0)