Ilmiy daraja olish uchun o‘tkazilgan dissertatsiya himoyalarining 70 foizi jonli efirga uzatilmagani aniqlandi

Korrupsiyaga qarshi kurashish agentligi tomonidan o‘tkazilgan monitoring tahlillariga ko‘ra, 2024-yilda o‘tkazilgan 3400 dan ortiq dissertatsiya himoyalarining 70 foizga yaqini jonli efirga uzatilmagan. Bu haqda “Daryo”ga agentlik matbuot kotibi Sherzod Saparov ma’lum qildi.

Davlat rahbarining 2023-yil 28-noyabrdagi “Korrupsiyaga qarshi kurashish tizimini yanada takomillashtirish hamda davlat organlari va tashkilotlari faoliyati ustidan jamoatchilik nazorati tizimi samaradorligini oshirish chora-tadbirlari to‘g‘risida”gi farmoniga muvofiq falsafa doktori (PhD) va fan doktori (DSc) ilmiy darajasini olish uchun ilmiy kengash tomonidan o‘tkaziladigan dissertatsiya himoyasi jarayonlarini internet tarmog‘i orqali jonli efirga uzatish belgilangan.

Mazkur farmon ijrosini ta’minlash maqsadida Korrupsiyaga qarshi kurashish agentligi tomonidan respublikadagi 152 ta muassasaning rasmiy veb-sayti asosida tahlil qilingan. 

“Unga ko‘ra, mazkur davrda ilmiy kengashlar tomonidan falsafa doktori (PhD) va fan doktori (DSc) ilmiy darajasini olish uchun o‘tkazilgan jami 3400 dan ortiq dissertatsiya himoyasidan 1130 tasi, ya’ni 33 foizi internet tarmog‘i orqali jonli efirga uzatilgan.

100 dan ortiq muassasaning rasmiy veb-saytida himoya jarayonini hech qanday cheklovlarsiz jonli efir orqali kuzatish imkonini beruvchi havolalar taqdim etilmagan.

Bu kabi holatlarga asosan quyidagi muassasalarda yo‘l qo‘yilgan:
— Qoraqalpoq davlat universiteti; 
— Namangan muhandislik-texnologiya instituti; 
— Urganch davlat universiteti;
— Toshkent davlat sharqshunoslik universiteti;
— Toshkent davlat stomatologiya instituti;
— Toshkent pediatriya tibbiyot instituti;
— Toshkent davlat texnika universiteti “Fan va taraqqiyot” DUK;
— Andijon davlat tibbiyot instituti;
— O‘zbekiston davlat jismoniy tarbiya va sport universiteti;
— Chirchiq davlat pedagogika universiteti;
— Qarshi davlat universiteti va boshqalar, deyiladi agentlik axborotida.

Ta’kidlanishicha, agentlik tomonidan qonunchilik talablarini buzgan muassasalarga tegishli ko‘rsatmalar va ogohlantirish xatlari kiritilgan.

Avvalroq O‘zbekistonda 2024-yilda jami 6898 nafar shaxs tomonidan 5716 ta korrupsiyaga oid jinoyat sodir etilgani ma’lum qilingandi.