Farg‘ona viloyati Qo‘qon shahrida bir guruh shaxslar tomonidan ko‘p yillik chinor arralab tashlangani haqida xabarlar tarqaldi. Ekologiya vazirligi matbuot xizmati holat yuzasidan “Daryo”ga ma’lumot berdi.
Unda aytilishicha, viloyat Ekologiya, atrof-muhitni muhofaza qilish va iqlim o‘zgarishi boshqarmasi Qo‘qon shahar bo‘limi inspektorlari tomonidan o‘rganish ishlari olib borilgan.
Shunda “Zilol” MFY A.T.Xo‘qandiy mavzesidagi 53-ko‘p qavatli uylar oldida noma’lum shaxslar 1 tup ko‘p yillik chinor daraxtini qasddan tag qismidan yarim qismigacha arralab qochib ketgani ma’lum bo‘lgan.
Ushbu holat yuzasidan tegishli tashkilot xodimlari ishtirokida kuzatuv dalolatnomasi tuzilib, o‘simlik dunyosiga yetkazilgan 117 million so‘m zarar hisoblandi. To‘plangan hujjatlar Qo‘qon shahar prokuraturasiga yuborildi.
Ayovsiz kesilayotgan daraxtlar
Toshkent viloyatida 2 tup ko‘p yillik chinorni kesgan shaxs tabiatga 199 mln so‘m zarar yetkazgani haqida xabar berilgandi. Xorazmda 4 tup pavlovniya daraxtini kesgan shaxs 27 mln so‘mdan ortiq jarimaga tortilgandi.
Shuningdek, Surxondaryoda avtomobil yo‘llarini rekonstruksiya qilishda qariyb 9,5 ming tup daraxt ko‘chirilishi mumkinligi aytilgandi. Shu bilan birga, Toshkent viloyatida 4 tup yong‘oq daraxtini kesgan shaxs tabiatga 247 mln so‘m zarar yetkazgandi.
Bundan tashqari, Jizzaxda tut daraxtlari kesilishi oqibatida o‘simlik dunyosiga 738 mln so‘mlik zarar yetkazilgan.
Jizzax viloyatida esa 19 tup daraxt kesilishi oqibatida tabiatga 435 mln so‘mlik zarar yetkazilgani xabar qilingandi.
Bu bo‘yicha qonun
O‘zbekistonda daraxt kesganlik uchun jazo choralarini kuchaytirish ko‘zda tutilgan qonun 2024-yil 1-martdan kuchga kirgan.
Unga ko‘ra daraxtlar, butalar, boshqa o‘simliklar va nihollar qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazganlik uchun:
- fuqarolar BHMning 25 baravaridan 50 baravarigacha — 8 million 500 ming so‘mdan 17 million so‘mgacha (shu paytga qadar BHMning 5 baravaridan 10 baravarigacha edi),
- mansabdorlar BHMning 50 baravaridan 75 baravarigacha, ya’ni 17 million so‘mdan 25 million 500 ming so‘mgacha (shu paytga qadar BHMning 10 baravaridan 15 baravarigacha) jarimaga tortiladi.
Izoh (0)