“O‘zbekiston Respublikasining ayrim qonun hujjatlariga homiylik faoliyatini amalga oshirish tartibini takomillashtirishga qaratilgan o‘zgartirish va qo‘shimchalar kiritish to‘g‘risida”gi qonun loyihasini jamoatchilik muhokamasi uchun e’lon qilindi.
Ushbu qonun loyihasi Qonunchilik palatasining 25-fevraldagi majlisida deputatlar tomonidan birinchi o‘qishda qabul qilingandi. Majlisda ehtiyojmand aholi qatlamlarini har tomonlama qo‘llab-quvvatlash borasida muayyan ishlar amalga oshirilayotgani, bu jarayonda nafaqat davlat organlari, balki fuqarolar ham xayriya, ehson va saxovat ishlarida tashabbuskorlik ko‘rsatayotgani, lekin amaldagi qonunchilikda homiylik xayriyalarini yig‘ish tartibi, bu sohadagi subyektlar faoliyatining ochiqligi, ularga ajratilgan mablag‘lar sarflanishining shaffofligi tizimi mukammal emasligi qayd etilgandi. Shuningdek, homiylik to‘g‘risidagi tartib-qoidalarni buzganlik uchun javobgarlik ham belgilanmagani aytilgandi.
Endilikda Ma’muriy javobgarlik to‘g‘risidagi kodeks 239-2-modda (homiylik to‘g‘risidagi qonunchilik talablarini buzish) bilan to‘ldirish taklif etilmoqda. Unda homiylik xayriyalarini yig‘ish tartibini buzish fuqarolarga BHMning 3 baravaridan 5 baravarigacha (1 million 125 ming so‘mdan 1 million 875 ming so‘mgacha), mansabdorlarga esa 5 baravaridan 7 baravarigacha (1 million 875 ming so‘mdan 2 million 625 ming so‘mgacha) miqdorda jarima solishga sabab bo‘lishi belgilanmoqda.
Qonun loyihasida homiylikni davlat tomonidan qo‘llab-quvvatlashning qo‘shimcha mexanizmlari, homiylik xayriyalarini yig‘ish, xayriya qutisini o‘rnatish va undan foydalanish tartiblari shuningdek, homiylik xayriyalari to‘g‘risidagi axborotni oshkor etish va bu jarayonning ochiqligini ta’minlash shartlari ham belgilanmoqda.
Xayriya qutisini o‘rnatish va undan foydalanish tartibini buzish, basharti ushbu kodeksning 188-3-moddasida (tilanchilik qilish) nazarda tutilgan huquqbuzarlik alomatlari mavjud bo‘lmasa, BHMning 3 baravaridan 5 baravarigacha miqdorda jarima solishga sabab bo‘lishi ko‘zda tutilmoqda.
Homiylik tashkilotining o‘z ta’minoti (shu jumladan faoliyati bilan bog‘liq barcha xarajatlari) uchun moliya yilida o‘zi sarflaydigan moliyaviy mablag‘larni qonunchilikda belgilangan miqdordan oshirib yuborilishi, jinoyat alomatlari mavjud bo‘lmagan taqdirda mansabdor shaxslarga BHMning 3 baravaridan 5 baravarigacha miqdorida jarima solishga sabab bo‘lishi belgilanmoqda.
Homiylik faoliyatini amalga oshirish tartibini takomillashtirishga qaratilgan qonun loyihasining qabul qilinishi homiylik xayriyalarini yig‘ish tartibini buzishning oldini olish, homiylik tashkilotlari faoliyatining shaffofligini ta’minlash hamda ularga nisbatan fuqarolarning ishonchini ortishiga xizmat qiladi.
Taklif va mulohazalar 8-martgacha qabul qilinadi.
Izoh (0)