Tojikistonning Vahdat shahridagi koloniyada 9 nafar mahbusdan iborat guruh qo‘lbola qurollar bilan qo‘riqchilarga hujum qildi. Bu haqda “Xovar” agentligi xabar berdi.
Hodisa 3-fevral kuni soat 15:44 da 3/2-sonli axloq tuzatish muassasasida yuz bergan. Hujum oqibatida koloniyaning uch nafar xodimi og‘ir tan jarohat olgan.
“Mahkumlar muassasa ma’muriyatining qonuniy talablariga bo‘ysunmay, qo‘lbola o‘tkir va tig‘li temir pichoqlardan foydalangan holda o‘z jinoiy harakatlarini davom ettirgan. Ular muassasa qo‘riqchilarini o‘ldirishga va qochishga uringan”, deyiladi xabarda.
Qo‘riqchilar qonun va xizmat yo‘riqnomalariga muvofiq hujum qilganlarga qarshi o‘qotar qurol ishlatishga majbur bo‘lgan. Oqibatda uch nafar mahkum zararsizlantirilgan, qolganlari esa qo‘lga olingan.
Jarohatlanganlarga tibbiy yordam ko‘rsatilgan, ularning salomatligi “me’yorida” ekani aytilmoqda. Muassasani qo‘riqlash va himoya qilish tizimi to‘liq tiklangan.
Bu birinchi holat emas
Bu Vahdat koloniyasida mahkumlarning itoatsizligi bilan bog‘liq birinchi favqulodda hodisa emas. 2019-yil 19-may kuni kechqurun aynan shu muassasada isyon ko‘tarilgan: pichoq va tig‘li buyumlar bilan qurollangan 30 nafar mahbus muassasaning 3 nafar xodimini garovga olib, keyinchalik ularni o‘ldirgan. Shundan so‘ng, ular boshqalarni qo‘rqitish maqsadida yana besh mahbusni qatl etgan.
Isyon bostirilgan. Hodisa oqibatida jami 29 nafar mahkum halok bo‘lgan. Tojikiston Oliy sudi Vahdat koloniyasidagi 28 nafar mahbusga isyon tashkil etganliklari uchun qo‘shimcha jazolar belgilagan.
Izoh (0)