“O‘zbekiston Respublikasining transport-logistika tizimini yanada rivojlantirish chora-tadbirlari to‘g‘risida”gi prezident qarori qabul qilindi.
Qarorga ko‘ra, O‘zbekistonning transport-logistika tizimini 2030-yilgacha rivojlantirish konsepsiyasi va uni amalga oshirish bo‘yicha “yo‘l xaritasi” tasdiqlandi.
Quyidagilarni nazarda tutuvchi asosiy maqsadli ko‘rsatkichlar va indikatorlar belgilandi, jumladan:
- avtomobil, temiryo‘l va havo transportida xalqaro yuk tashish umumiy hajmini kamida 2 baravarga oshirish;
- transport va logistika xizmatlari eksportini 2 baravargacha oshirish;
- konteynerlarda yuk tashish ulushini kamida 1,5 barobarga oshirish;
- Jahon bankining Logistika samaradorligi indeksida (LPI) O‘zbekistonning o‘rnini 55-pog‘onadan past bo‘lmagan darajagacha ko‘tarish.
Yuklarni xalqaro tashishni tashkil etishda transport-ekspeditorlik xizmatlariga QQS nol stavkada qo‘llanadi.
Hujjatda belgilanishicha, 2025-yil 1-iyundan davlat chegarasi orqali avtomobil o‘tkazish punktlarida avtotransport vositalarining elektron navbat tizimi joriy etiladi. 27-yanvardan sinov tarzida ishga tushirilgan Qozog‘iston bilan chegaradagi “Navoiy” bojxona postida xalqaro yo‘nalishdagi avtomobillar uchun elektron navbat tizimi joriy etilishi ma’lum qilingandi.
Xalqaro avtomobil transporti ittifoqi bilan hamkorlikda Xalqaro avtomobil transporti sohasida kadrlar tayyorlash va ularning malakasini oshirish bo‘yicha mintaqaviy o‘quv markazi tashkil etiladi. Shuningdek, umumiy foydalanishdagi avtomobil yo‘llari bo‘ylarida yo‘lbo‘yi servis (Service area va Service point) obyektlari tashkil etiladi.
Shavkat Mirziyoyev 11-yanvar kuni tansport-logistika tizimini rivojlantirish chora-tadbirlari taqdimoti bilan tanishganda mutasaddilarga elektron navbat tizimini joriy etib, chegaradan o‘tish vaqtini 20 daqiqagacha qisqartirish, transport vositalarini onlayn kuzatishni yo‘lga qo‘yish orqali qo‘shimcha yuk oqimlarini jalb qilishni topshirgandi.
Davlat rahbari O‘zbekistonda yuk jo‘natuvchi va tashuvchini o‘zaro bog‘laydigan ekspeditorlik xizmatlarining asosiy qismi xorijiy kompaniyalarga to‘g‘ri kelishini, endilikda bu sohada mahalliy ekspeditorlarini qo‘llab-quvvatlash maqsadida ularning xalqaro yuk tashishdagi xizmatlariga qo‘shilgan qiymat solig‘i olinmasligini aytgandi. Buning natijasida mahalliy korxonalar ulushini 45-50 foizga chiqarish imkoniyati bo‘ladi.
Izoh (0)