Sirdaryo viloyati Sayxunobod tumanida 10 ming dollar evaziga AQSH vizasini olib bermoqchi bo‘lgan shaxs ushlandi.
U Bosh prokuratura huzuridagi Iqtisodiy jinoyatlarga qarshi kurashish departamentining Sayxunobod tumani bo‘limi tomonidan o‘tkazilgan tezkor tadbirda qo‘lga tushgan.
Ma’lum bo‘lishicha, fuqaro I.R. fuqaro Sh.X.ning ishonchiga kirib, unga tanishlari yordamida 10 ming dollar evaziga AQSHga borishi uchun talabalik vizasini olib berishini aytib, shundan 5 ming dollar va 26 mln so‘m pulni olgan vaqtida ashyoviy dalillar bilan ushlangan.
Holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
AQSHga noqonuniy borish
O‘zbekistondan AQSHga noqonuniy borish bilan bog‘liq firibgarlik holatlari haqida xabar berilishiga qaramay, bunday holatlar tez-tez qayd etilmoqda. Xususan, 2024-yil fevralida AQSHga aldov yo‘li bilan yubormoqchi bo‘lgan yetti kishi ushlandi. Aprel oyida O‘zbekistonning to‘rt hududida AQSHga noqonuniy yo‘llar bilan yuborishni va’da qilgan yana bir necha shaxslar ushlandi. Ular bu maqsadda 14—19 ming dollar atrofida pul talab qilgan.
AQSHning O‘zbekistondagi elchixonasi noqonuniy migratsiya xavfli va serxarajat urinish ekanini bildirib, O‘zbekiston fuqarolarini odamlarni tovar sifatida ko‘radigan jinoiy guruhlar yolg‘on vaʼdalariga ishonib, jabrdiyda bo‘lishdan ogohlantirgan.
2024-yilda AQSH hukumati 572 o‘zbekni deportatsiya qilgan. Bu undan avvalgi yilga nisbatan 6,5 baravar ko‘p. 2013-yilda 88 kishi, 2022 va 2021-yillarda esa deportatsiya qilingan o‘zbekistonliklar soni mos ravishda 21 va 55 kishini tashkil qilgan.
Izoh (0)