Surxondaryoda o‘quvchilar sovuq havoda yupun kiyimda tadbirga jalb qilingani aniqlanib, bunga sabab bo‘lgan mansabdorlar intizomiy jazoga tortildi. Bu haqda bolalar ombudsmani xabar berdi.
Aniqlanishicha, 2024-yil 6-dekabr kuni Surxondaryo viloyati, Denov tumani hududidan o‘tgan avtomobil yo‘li bilan bog‘lovchi, temiryo‘l ustidan o‘tgan ko‘prik foydalanishga topshirilib, ko‘prikning ochilish marosimiga sovuq ob-havoda Denov tumanidagi 14 va 16-sonli musiqa maktablarining o‘quvchilari (16 nafar qiz hamda 4 nafar o‘g‘il bola) tumanning Madaniyat boshqarmasi topshirig‘iga ko‘ra yengil bayramona kiyimlarni kiygan holda jalb qilingan.
Ushbu holat yuzasidan bolalar ombudsmani Madaniyat vazirligiga bolalarning sog‘lig‘ini xavf ostiga qo‘ygan mas’ullarga tegishli chora ko‘rish va bunday holatlarga yo‘l qo‘ymaslik yuzasidan taqdimnoma kiritgan.
Taqdimnoma Madaniyat vazirligi tomonidan o‘rganib chiqilib, bolalarning sog‘lig‘i xavf ostiga qo‘yilgani yuzasidan hududning tegishli mansabdor shaxslariga nisbatan intizomiy jazo qo‘llangan.
Shuningdek, Madaniyat vazirligi tomonidan vazirlik tasarrufidagi tashkilotlarga yuqorida qayd etilgan qonunbuzilish holatlariga takroran yo‘l qo‘ymaslik, o‘quvchilarni har qanday tadbirlarga asossiz jalb qilishni qat’iyan taqiqlash choralarini ko‘rishga oid ko‘rsatmalar berilgan.
Bolalarning sovuq ob-havoda yupun kiyimda tadbirga jalb qilish holatlari avval ham ko‘p kuzatilgan. Maktab o‘qituvchi va rahbarlari bolalarni maktab vaqtidan tashqari, ularning salomatligi hamda xavfsizligiga xavf soladigan turli tadbirlarga jalb qilmaslik bo‘yicha doimiy ravishda ogohlantirib kelinayotganiga qaramasdan shu kabi ayanchli holatlar yuzaga kelgan.
Izoh (0)