Ijtimoiy tarmoqlar hayotimizning asosiy bo‘lagiga aylangani sari undan daromad olishga qiziquvchilar soni ortmoqda. Afsuski, ko‘proq obunachi yig‘ish va foydalanuvchilar eʼtiboriga tushish uchun ko‘ngli tusagan yo‘nalishda video ishlayotganlar ham yo‘q emas. “Daryo” masalaga chuqurroq yondashib, ijtimoiy tarmoqlardagi ideal hayot illyuziyasi haqida ko‘rsatuv tayyorladi.
Instagram’da ko‘pchilik soxta baxtini ko‘z-ko‘z qilib, o‘zida yo‘q narsani bordek qilib ko‘rsatish bilan ovoradek tuyuladi. Afsuski, blogerlar ko‘rsatayotgan soxta baxtli hayot sabab yoshlarimiz orasida ular boy, men ham shu ishni qilishim kerak, degan fikr paydo bo‘ldi. Ular ochiqchasiga “Blogerlik qilsam, tez boy bo‘lib ketaman”, deb orzu qilishyapti. Ishonch bilan aytish kerakki, aslida blogerlik kasb emas. Agar internet o‘chib qolsa, bu faoliyat turi o‘sha kuni to‘xtaydi. Inson oldiga aniq maqsadni qo‘yib, kasb yoki hunarni o‘rganishi kerak. Afsuski, ayrim yoshlarimiz tiktokerlarga qiziqib, hayo-iboni unutib qo‘yishyapti. Qo‘pol qilib aytganda, milliy maʼnaviyatimizga tupurib, ko‘ngillari tusagan ishni qilishyapti, deydi psixolog Shoira Isoqova.
Ekspert Saidabror Umarov ayrim chala motivator va psixologlar oilalarning ajralishiga sabab bo‘layotgani haqida gapirdi.
Chala motivator va psixologlar orasida o‘z shaxsiy hayoti misolida odamlarga yo‘l-yo‘riq ko‘rsatishga urinish holatlari ko‘payib keldi. Shaxsiy hayot o‘z nomi bilan shaxsiy, uni ommaga moslashtirib bo‘lmaydi. “Mana men birinchi erimdan ajrashganimda bunday qilgan edim, keyin ikkinchi marta oila qurdim”, deya ayollarga aql o‘rgatadiganlar ko‘payib ketdi. To‘g‘ri, qayta oila qurish ayb emas, qonuniy va sharʼiy nikohi bo‘lsa, bemalol yashayversin. Ammo bir oilasini saqlolmagan, muqim baxtli hayot kechirolmagan insonning boshqalarga bu borada maslahat berishida biror mantiq yo‘q. Bu xuddi kambag‘al odamning seni boy qilaman, deyishiga o‘xshaydi, deydi Saidabror Umarov.
Ko‘rsatuv davomida Instagram’dagi baʼzi blogerlar targ‘ib qilayotgan g‘oyalar sabab oilalar tinchligi buzilayotgani haqida ham fikrlar bildirildi. Bundan tashqari, ko‘rilishlar sonining ortishi uchun ibo-hayoni bir chetga surayotgan va oilasidagi vaziyatni ommaga olib chiqayotganlar ham tanqid qilindi.
Videoni to‘liq holda tomosha qiling.
Izoh (0)