O‘zbekistonda aerotaksi xizmati va VIP taksi joriy etilishi kutilmoqda. Bu haqda Transport vazirligi xabar berdi.
Shavkat Mirziyoyevning BAAga rasmiy tashrifi doirasida O‘zbekiston Transport vaziri Ilhom Mahkamov hamda BAAning Jetex kompaniyasi ta’sischisi Adel Mardini o‘rtasida uchrashuv o‘tkazildi. Unda Transport vazirligi va Jetex kompaniyasi o‘rtasida hamkorlik memorandumi imzolandi.
Ta’kidlanishicha, ushbu memorandum O‘zbekiston fuqaro aviatsiyasi sohasida yangi istiqbolli loyihalarni amalga oshirish uchun zamin yaratadi. Xususan, Jetex kompaniyasi “Toshkent—Sharqiy” aeroportida FBO shaklida davlat xususiy sherikchiligi asosida VIP va CIP mijozlarga xizmat ko‘rsatishni tashkil etish bo‘yicha investitsion loyihani amalga oshiradi.
Ushbu loyiha doirasida kichik aviatsiya sohasida ta’mirlash, sotish va saqlash xizmatlari yo‘lga qo‘yiladi. Aerotaksi xizmati va VIP taksi joriy etiladi. Bu esa o‘z navbatida turizm sohasining rivojlanishiga ijobiy ta’sir ko‘rsatadi hamda VIP mijozlar uchun qulaylik yaratadi.
“Yo‘lovchilarga yuqori darajadagi xizmat ko‘rsatishni ta’minlaydigan mazkur loyihaning muvaffaqiyatli amalga oshirilishi poytaxtimiz nufuzi va jozibadorligini yanada oshirishga xizmat qiladi. Qolaversa, mamlakatimizda biznes aviatsiya sohasida 200 dan ko‘proq yuqori malakali ish o‘rinlari yaratilishiga erishiladi. Bir so‘z bilan aytganda, Jetex kompaniyasining ilg‘or tajribasiga tayangan holda mamlakatimizda biznes aviatsiyasini ishonchli va barqaror rivojlanishini ta’minlashga erishildi”, deyiladi xabarda.
Jetex kompaniyasi haqida
Kompaniya 2005-yilda tashkil etilgan bo‘lib, 5 qit’ada 30 ta biznes birlashmasiga ega global tarmoqni tashkil etgan. Butun dunyo bo‘ylab 50 dan ortiq nuqtalarda, jumladan, Yaqin Sharq, Yevropa, Osiyo-Tinch okeani mintaqasi, Afrika va Amerikada kun-u tun mijozlarga xizmat ko‘rsatish bilan shug‘ullanadi.
BAAning Jetex kompaniyasi O‘zbekiston aviatsiya bozoriga kirishi haqida 2020-yilda ma’lum qilingandi. Kompaniya o‘z mablag‘lari hisobidan Toshkent xalqaro aeroporti infratuzilmasini yanada rivojlantirish maqsadida yo‘lovchilar va biznes aviatsiyaga xizmat ko‘rsatuvchi yangi maxsus terminal va angar qurishni rejalashtirayotgani aytilgandi.
FBO (Fixed Base Operator) — aeroportlarda havo kemalari va yo‘lovchilarga kompleks servis xizmatlari ko‘rsatuvchi, xususan, havo kemalariga yoqilg‘i quyish, to‘xtash joyi, angarda saqlash, texnik va ta’mirlash xizmatlarini ko‘rsatish, havo kemalarini ijaraga berish, charterlarni sotish, taksi va yana boshqa ko‘plab xizmat turlarini ko‘rsatuvchi tashkilotdir.
Izoh (0)