“Xalq banki” Surxondaryo viloyati Boysun, Uzun, Muzrabot va Oltinsoy tumanlarida joylashgan bank binolarini ta’mirlash bo‘yicha tenderlar o‘tkazgani, ularda aka-ukalarga tegishli qurilish kompaniyalari raqobatlashgani haqida xabar berilgan edi.
Mazkur holat yuzasidan Korrupsiyaga qarshi kurashish agentligi matbuot kotibi Sherzod Saparov munosabat bildirdi.
Ta’kidlanishicha, agentlik tomonidan “Xalq banki” tomonidan o‘tkazilgan tanlovlarda o‘zaro affillangan shaxslarga tegishli tadbirkorlik subyektlari ishtirok etganiga oid xabar tegishli tartibda o‘rganib chiqilgan.
“O‘rganishda tanlovlarda ishtirok etgan tadbirkorlik subyektlari — g‘oliblikni qo‘lga kiritgan “Chinor” xususiy korxonasi va “Toshkent-Termiz-Qurilish” MCHJ haqiqatan ham o‘zaro affillangan shaxslarga tegishli ekanligi o‘z tasdig‘ini topdi.
Mazkur davlat xaridlari “Davlat xaridlari to‘g‘risida”gi va “Raqobat to‘g‘risida”gi qonunlar talablariga zid ravishda o‘tkazilgan.
Agentlik tomonidan yuqoridagi qonunbuzilishi holatlarini bartaraf etish va kelgusida oldini olish yuzasidan O‘zbekiston Respublikasi Markaziy bankiga taqdimnoma kiritildi.
Shuningdek, davlat xaridlari to‘g‘risidagi qonunchilik buzilishiga yo‘l qo‘ygan shaxslarni tegishli javobgarlikka tortish maqsadida to‘plangan hujjatlar huquqni muhofaza qiluvchi organga yuborildi”, — deyiladi agentlik axborotida.
Avvalroq “Daryo” “Xalq banki” 13–19-dekabr kunlari boshlang‘ich narxi salkam 626 mln so‘mlik qurilish bo‘yicha tender o‘tkazgani, unda komissiya a’zolari g‘olibga yon bosgan bo‘lishi mumkinligi haqida yozgandi.
E’tiborli jihati, ushbu tender g‘olibi ham “Toshkent-Termiz-Qurilish” mas’uliyati cheklangan jamiyati hisoblanadi.
Izoh (0)