Oliy ta’lim, fan va innovatsiyalar vazirligi diplomlari to‘g‘ridan to‘g‘ri tan olinadigan top-1000 talikka kirgan OTMlar ro‘yxatini tasdiqladi.
Unda xalqaro e’tirof etilgan tashkilotlarning (Quacquarelli Symonds World University Rankings, Times Nigher Education, Academic Ranking of World Universities) reytingida oliy ta’lim muassasalari orasida birinchi 1 000 o‘rinni egallagan xorijiy oliy ta’lim muassasalari o‘rin olgan.
Ushbu ro‘yxat 2025-yil uchun e’lon qilingan bo‘lib, har yili yangilanib turadi. Yangi ro‘yxatdan 3004 ta oliygoh o‘rin olgan. Xususan, Markaziy Osiyodan bu ro‘yxatga faqat Qozog‘istonning ayrim OTMlari kiritilgan. Jumadan, Nazarboyev universiteti, Al-Farobiy nomidagi Qozog‘iston xalqaro universiteti, L.N. Gumilyov nomidagi Yevrosiyo milliy universiteti, Muxtor Auezov nomidagi Janubiy Qozog‘iston tadqiqot universiteti, Qozog‘iston Milliy agrar universiteti, Xo‘ja Ahmad Yassaviy nomidagi xalqaro qozoq-turk universiteti, Olmaota texnologik universiteti va boshqalar.
2024-yilda ushbu ro‘yxatga 1002 ta oliygoh kiritilgandi.
Top-1000 oliygohlarni tamomlagan talabalarning diplomlari O‘zbekistonda imtihon sinovlarisiz tan olinadi (nostrifikatsiya qilinadi).
Buyuk Britaniyaning Times Higher Education-THE reyting tashkiloti 22-yanvar kuni World University Rankings 2025 by Subject fanlar bo‘yicha dunyoning eng nufuzli oliygohlar ro‘yxatini eʼlon qildi. Unda O‘zbekistonning 3 ta oliy taʼlim tashkiloti ilk marotaba THE tashkiloti tomonidan eʼlon qilingan fan reytingidan joy oldi. Bular Toshkent irrigatsiya va qishloq xo‘jaligini mexanizatsiyalash muhandislari instituti, Mirzo Ulug‘bek nomidagi O‘zbekiston Milliy universiteti, Toshkent axborot texnologiyalari universiteti.
2024-yilda Toshkent irrigatsiya va qishloq xo‘jaligini mexanizatsiyalash muhandislari instituti Milliy tadqiqot universiteti hamda Mirzo Ulug‘bek nomidagi O‘zbekiston milliy universiteti Britaniyaning QS Quacquarelli Symonds xalqaro reyting agentligining eng yaxshi universitetlar reytingi – QS World University Rankings’da munosib joy egallagandi.
Izoh (0)