G‘azoda besh yoshgacha bo‘lgan 3500 dan ortiq bola ochlik sababli o‘lim yoqasida. Isroilning ikki oydan ortiq davom etgan umumiy blokadasi sharoitida 70 mingga yaqin bola to‘yib ovqatlanmaslik tufayli anklavda kasalxonaga yotqizilgan. Bu haqda Al Jazeera nashri G‘azo hukumatining ommaviy axborot vositalari idorasiga tayanib xabar berdi.
Ushbu tizimli blokada ostida besh yoshgacha bo‘lgan 3,5 mingdan ortiq bola ochlikdan vafot etishi mumkin. Yana 290 mingga yaqin bola esa o‘lim yoqasida turibdi. Isroil ochlikdan qurol sifatida foydalanayotgan bir paytda har kuni 1,1 million bolani minimal oziq-ovqat bilan ta’minlashning iloji yo‘q. Xalqaro hamjamiyat ham sukut saqlamoqda, deya bayonot berdi G‘azo hukumati.
Kamida 57 nafar falastinlik ochlikdan halok bo‘ldi. Bundan butun dunyo g‘azablangan bo‘lsa-da, Isroil 2,3 million kishilik anklavga yordam yetkazib berilishiga to‘sqinlik qilmoqda.
BMTning ta’kidlashicha, aholining 80 foizdan ortig‘i xalqaro yordamga tayanadi. G‘azo bozorlaridagi narx-navoga ko‘pchilikning qurbi yetmaydi
Isroil o‘z navbatida, qamal zarurligini, bu mavjud asirlarni ozod qilishga yordam berishini ta’kidlamoqda. Hozirda G‘azoda qolgan 59 nafar asirning 24 nafari tirik ekani taxmin qilinyapti. Isroilning G‘azoga qarshi urushi oqibatida umumiy 52 495 falastinlik halok bo‘lgan, yana 118 366 nafari yaralangan.
Izoh (0)