Farg‘onada ikki marta sudlangan ayol takroran tovlamachilik sodir etgani uchun ozodlikdan mahrum etildi. Bu haqda “Zamon” informatsion dasturida ma’lum qilindi.
Qayd etilishicha, Yozyovon tumanida faoliyat olib boruvchi profilaktika inspektori Mahmudov Farg‘ona viloyati IIB boshlig‘iga bildirgi va ariza bilan murojaat qilgan. Unda aytilishicha, inspektor ozodlikni cheklash jazosini o‘tayotgan fuqaro Abdullayevani yashash xonadoniga soat 22:00 dan so‘ng, uni jazo o‘tash qoidalariga rioya etayotganini tekshirish uchun borgan hamda hujjatlar rasmiylashtirgan.
Fuqaro Abdullayeva inspektordan qasd olish maqsadida viloyat IIB ishonch raqamiga qo‘ng‘iroq qilib, inspektor Mahmudov undan qarz olgani, ancha kundan beri aldab bermay kelayotgani haqida yolg‘on xabar berib, xodimga chora ko‘rishni so‘ragan.
Talab qilgan mablag‘ni bermasa, sharmanda qilishni davom ettishini aytgani uchun Mahmudov o‘zining rahbariyatiga ariza bilan murojaat qilgan. Holat yuzasidan o‘tkazilgan tergov ishlari davomida fuqaro Abdullayeva inspektordan talab qilgan pulni olayotgan paytda qo‘lga olingan.
Bundan tashqari, Abdullayeva uchta holatda o‘zgalar bilan ishqiy munosabatga kirishib, ular qarzdor ekani haqida bir necha marotaba IIBga yolg‘on ariza bergan. “Oshiqlarining” oilasi va ishxonadagilarini oldida sharmanda qilish bilan qo‘rqitib, ularga homilador ekanligi bo‘yicha yolg‘on gapirib, 3 kishidan salkam 14 million so‘m va 300 dollar undirgan.
Sudda ayblanuvchi Abdullayeva Jinoyat kodeksi 165-moddasi (tovlamachilik) bilan aybli deb topilib, 5 yil 3 oyga ozodlikdan mahrum qilindi.
Avvalroq Samarqandda fuqarolarga nisbatan jismoniy kuch ishlatgan ichki ishlar organi xodimi ishdan bo‘shatilgani to‘g‘risida xabar berilgandi.
Izoh (0)