AQSH prezidenti Donald Tramp yillik daromadi 2,5 million dollardan yuqori bo‘lgan amerikaliklar uchun daromad solig‘ini oshirmoqchi. Bu haqda Bloomberg agentligi xabar berdi.
Ma’lumotlarga ko‘ra, Tramp allaqachon bu masalani Kongress vakillar palatasi spikeri Mayk Jonson bilan muhokama qilgan.
“Prezident taklifi yiliga kamida 2,5 million dollar daromad oladigan shaxslar yoki 5 million dollar daromad oladigan er-xotinlar uchun 39,6 foiz miqdorida yangi soliq stavkasini joriy etishni nazarda tutadi”, deyiladi xabarda.
Bundan tashqari, Oq uy rahbari to‘g‘ridan-to‘g‘ri investitsiya fondlari va venchur kompaniyalari boshqaruvchilari uchun soliq imtiyozlarini ham bekor qilmoqchi.
Hozirda AQSHda eng yuqori daromad solig‘i stavkasi 37 foizni tashkil etadi.
Agentlik ta’kidlashicha, soliqning oshirilishi Tramp ma’muriyatiga choy puli va ish vaqtidan tashqari ishlash uchun soliqni bekor qilishdan ko‘rilgan yo‘qotishlarni qoplashga yordam beradi.
Qayd etilishicha, soliqlarning oshirilishi o‘n yil ichida byudjetga qo‘shimcha 67,3 milliard dollar jalb qilish imkonini beradi.
Bundan oldin Tramp import qilinadigan tovarlarga bojlar joriy etilishi AQSHga daromad solig‘idan butunlay voz kechish imkonini berishi mumkinligini aytgan edi.
“Ehtimol, bularning barchasi ishlay boshlagach, bizga daromad solig‘i tizimi umuman kerak bo‘lmaydi”, degan edi u.
Izoh (0)