Olimlar yaqinda kashf qilingan 2025 KF nomli asteroid 21-may kuni tunda Yerga yaqinlashishini ma‘lum qildi. Bu haqda Space xabar berdi.
19-may kuni astronomlar 2025 KF nomli yangi asteroidni aniqlagan. Uning o‘lchami 10-25 metrga baholanmoqda. Taqqoslash uchun, 9 qavatli binoning balandligi taxminan 25 metrni tashkil qiladi.
Olimlarning hisob-kitoblariga ko‘ra, yangi asteroid 41 ming km/soatdan ortiq tezlikda uchadi. U 21-may kuni Toshkent vaqti bilan soat 22:30 da Yerdan taxminan 115 ming kilometr masofada uchib o‘tadi. Bu Oy va Yer o‘rtasidagi masofaning taxminan uchdan bir qismiga teng. Ammo kosmik o‘lchovlar bo‘yicha bu yaqin hisoblanadi.
2025 KF asteroidi Yerga tushmasligi sababli potensial xavfli hisoblanmaydi. U Oyga ham urilmasligi va Yerning tabiiy yo‘ldoshidan 226 000 kilometrdan ortiq masofada o‘tib ketishi kutilmoqda.
Mazkur asteroid Yerga tushgan taqdirda ham, kichik o‘lchamdaligi sababli atmosferada yonib ketgan bo‘lardi. Natijada, odamlar va infratuzilmaga hech qanday zarar yetmasdi.
1998-yildan boshlab NASA potensial xavfli Yer atrofidagi asteroidlarni kuzata boshladi va o‘shandan beri taxminan 40 000 ta kosmik toshlar topildi. Har yili Yerga yaqin masofadan bir necha metr, ba’zan undan ham kattaroq bo‘lgan o‘nlab asteroidlar uchib o‘tadi.
Ammo asteroidlar Yerning tortishish kuchi ta’sirida, shuningdek, koinotdagi boshqa toshlar bilan to‘qnashuv natijasida o‘z trayektoriyasini o‘zgartirishi mumkin. Shu sababli, olimlar doimiy ravishda Yerga yaqin asteroidlarni kuzatishda davom etmoqda.
Shuni ta’kidlash lozimki, 2025 KF asteroidining Yerga yaqinlashishi, hozirga qadar ma’lum bo‘lgan kosmik toshlarning eng yaqin uchish rekordini yangilay olmaydi. 2020-yilda 2020 QG asteroidi Yerdan atigi 2950 kilometr masofada uchib o‘tgan edi. Bunday masofada Yer atrofida ayrim sun’iy yo‘ldoshlar aylanib turadi.
Izoh (0)