Toshkent viloyatida madaniy meros obyektlarini muhofaza qilishga qaratilgan nazorat tadbirlari o‘tkazilganda 13 ta yodgorlikka 342 milliard so‘m zarar yetkazilgani aniqlandi. Bu haqda Bosh prokuratura matbuot xizmati xabar berdi.
Tekshirishda, xususan, quyidagi noyob arxeologiya yodgorliklariga jiddiy ziyon yetkazilgani aniqlandi:
- Oqqo‘rg‘on tumanida “Zokirtepa” (V–VII asrlar) yodgorligining 1400 metr kub qismi terak ekish uchun qazilishi natijasida 44,6 mlrd;
- “Sanchtepa” yodgorligining 129 metr kub qismi yo‘l ochish uchun tekislanib, 2,2 mlrd;
- Parkent tumanida “Qorovultepa” yodgorligining 941 metr kub qismi va “Yertepa” yodgorligining 23 metr kub qismi buzilib, jami 16,4 mlrd;
- Piskent tumanida “Mingtepa” (milloddan avvalgi V asr) yodgorligining 7000 metr kub qismi buzilib, 231 mlrd;
- Ohangaron tumanida “Dumgalaktepa” (V–VI asrlar) yodgorligining 658 metr kub qismi texnika yordamida qazilib, 21 mlrd;
- Yuqori Chirchiq tumanida “Xojakaytepa” (V–VII asrlar) yodgorligining 43 metr kub qismi tekislanib, 1,3 mlrd;
- O‘rta Chirchiq tumanida “Tuyabo‘g‘iztepa” yodgorligining 54 metr kub qismi buzilib, 1,7 mlrd;
- Nurafshon shahrida “Chordaratepa” (III–VIII asrlar) yodgorligining 38 metr qismi buzilib, 1,2 mlrd so‘m.
Holat yuzasidan jinoyat ishlari qo‘zg‘atildi va dastlabki tergov harakatlari olib borilmoqda. Nazorat tadbirlari esa davom ettiriladi.
2025-yilning mart oyida Samarqand viloyatidagi XIX-XX asrlarga oid 3 ta tarixiy masjid binolari buzib tashlangani aniqlangandi. Prokuratura organlari tomonidan Madaniy meros agentligi bilan hamkorlikda o‘tkazilgan nazorat tadbirlari davomida 3 ta tarixiy masjid binolari buzib tashlanganidan tashqari, yana bir masjid tegishli ruxsatsiz ta’mirlangani oqibatida yodgorliklarga jami 46,8 milliard so‘mlik zarar yetkazilgan.
Izoh (0)