Korrupsiyaga qarshi kurashish agentligi vakolatli organ sifatida manfaatlar to‘qnashuviga yo‘l qo‘yilganlik holati kuzatilsa, shartnomani sud orqali bekor qilishi mumkin. Bu haqda “Manfaatlar to‘qnashuvi to‘g‘risida”gi qonuniga bag‘ishlangan matbuot anjumanida Korrupsiyaga qarshi kurashish agentligi direktori Akmal Burxonov aytib o‘tdi, deya xabar bermoqda “Daryo” muxbiri.
Bizning qo‘limizda qurolimiz bor. Agentlikka shunday vakolat berilyaptiki, shartnoma imzolanganidan keyin ham sud orqali bekor qilishimiz mumkin. Bunda yetkazilgan zararni davlat to‘lab bermaydi. Masalan, tadbirkorga pulni qaytarish kerak, deylik. Endilikda kim o‘sha xaridni amalga oshirgan bo‘lsa, ya’ni qaysi mansabdor shaxs javobgar taraf bo‘lsa zararni o‘zi to‘lab beradi.
Bu yerda davlat yutqazmaydi. Kim qonun buzilishiga yo‘l qo‘ygan bo‘lsa, o‘sha odamning cho‘ntagidan pulni to‘latib, yetkazilgan zararni qoplab berilishi nazarda tutilgan, —dedi Korrupsiyaga qarshi kurashish agentligi direktori.
Uning alohida ta’kidlashicha, agar yo‘l xaritasida ko‘rsatilgan ishlar to‘laqonli amalga oshirilsa, qonun 100 foiz ishlab ketadi.
Avvalroq davlat organlaridagi manfaatlar to‘qnashuvi holatlari bosh vazir nazoratida bo‘lishi aytilgan edi.
Izoh (0)