Jinoyat olamida “qonundagi o‘g‘ri — Baxti Tashkentskiy” maqomini olgan Baxtiyor Qudratullayev va 36 nafar ayblanuvchi bo‘yicha sud majlisi boshlandi. Bu haqda sudda qatnashgan “Daryo” jurnalisti xabar berdi.
Jinoyat ishlari bo‘yicha Yunusobod tuman sudida JIB Shayxontohur tuman sudi raisi Tolibjon Obidov boshchiligidagi sudlov hay’ati “ko‘cha” nomini olgan to‘da ishini ko‘rib chiqishni boshladi.
Dastlabki tergov organining ayblov xulosasiga ko‘ra, sudlanuvchilar — B.Qudratullayev, Sh.Qurbanov, B.Zafarov, Sh.Rahimov, A.Xo‘jayev, D.Sharipov, A.Mirzaxonov, Sh.Sulaymonqulov, A.Norqulov, S.Hotamov, N.Jumaniyazova, R.Shakurov, Sh.Qudratullayev, T.Turmonov, F.Vapayev, M.Nosirxo‘jayev, D.Mo‘minxo‘jayev, M.Usmonboyev, M.Shodmanov, B.Xudyorov, A.Mashrafxonov, V.Qurbanov, A.Mahamadiyorov, A.Jo‘rayev, B.Bakayev, I.Qudratullayev, A.Aliyev, J.Soliyev, A.Tursunboyev, B.Normirzayev, F.Kamalov, M.Mirzoyev, N.Bagadirov, A.Shyelyov, M.Qurbanov, O.Islomov va M.Ibodullayev Jinoyat kodeksining 104, 109, 138, 165, 168, 228, 242, 243, 273, 276 va 277-moddalarida nazarda tutilgan jinoyatlarni sodir etganlikda ayblanmoqda.
Oliy sud axborot xizmatining aniqlashtirishicha, 36 nafar sudlanuvchiga nisbatan “qamoqqa olish” va bir nafariga “garov“ tarzidagi ehtiyot chorasi qo‘llanilgan.
Tasdiqlangan ayblov xulosasiga ko‘ra mazkur jinoyat ishi doirasida 46 nafar jabrlanuvchi va 70 nafar guvoh aniqlangan, — deyiladi mas’ullar izohida.
Bugun, 3-iyun kuni boshlangan sud majlisida dastlab 37 nafar sudlanuvchining shaxsiga aniqlik kiritildi. Advokatlar va sudlanuvchilarning iltimosnomalari tinglandi. Davlat ayblovchisi tomonidan jinoiy guruh ta’zolariga nisbatan e’lon qilingan ayblov xulosasi o‘qib eshittirildi.
“Baxti Tashkentskiy” o‘ziga nisbatan e’lon qilingan barcha ayblovlarni rad etgan bo‘lsa, yana bir sudlanuvchi prokuror ayblovida o‘ziga qo‘yilgan ayblovlarni eshitib, qo‘rqib ketganini aytdi.
Sud 5-iyun, soat 10:00 ga qadar tanaffus e’lon qildi.
Eslatib o‘tamiz, 2023-yil 2-dekabr kuni Toshkent shahrida “Saidaziz medgorodok” laqabi bilan tanilgan shaxs qo‘lga olingani maʼlum bo‘ldi. U atrofiga jismonan baquvvat shaxslarni to‘plab, qarzdorlik va boshqa muammolarni qonunni chetlab o‘tgan holda hal qilib berish bilan shug‘ullangan. 3-dekabr kuni esa huquq-tartibot idoralari xodimlari “Baxti Tashkentskiy” laqabi bilan tanilgan Baxtiyor Qudratullayevni qo‘lga oldi.
Ko‘p o‘tmay Toshkent shahrida profilaktik tadbir davomida Salimboy nomi bilan tanilgan Salim Abduvaliyev ham ushlandi. 1950-yilda tug‘ilgan Abduvaliyev Salim Kirgizbayevich (248-modda 1-qismi, o‘qotar qurolni qonunga xilof ravishda saqlash) gumon qilinuvchi tarzida jalb etilgan. Mart oxirlarida unga 6 yil muddatga ozodlikdan mahrum qilish jazosi tayinlangani maʼlum bo‘ldi.
Izoh (0)