“Xususiy sektorning iqtisodiyotdagi ulushi 85 foizga yetkaziladi” — O‘zbekistonning JSTga aʼzo bo‘lish yo‘lidagi rejalari aytildi

Joriy yilning 5-iyun kuni Toshkent shahrida “O‘zbekistonda iqtisodiy islohotlar va Jahon savdo tashkilotiga aʼzo bo‘lish jarayoni” mavzusida xalqaro anjuman bo‘lib o‘tdi.

Tadbirda O‘zbekiston hukumati vakillari, Jahon savdo tashkiloti (JST) rahbari, Jahon banki va Xalqaro valyuta jamg‘armasi rasmiylari ishtirok etdi.

Tadbir avvalida O‘zbekiston prezidenti yordamchisi Saida Mirziyoyeva so‘zga chiqib, JSTga aʼzo bo‘lish savdo erkinligi va iqtisodiyot o‘sishga katta turtki berishini aytdi.

“Oxirgi 14 oyda Jahon savdo tashkilotiga aʼzo bo‘lish bo‘yicha uchta ishchi guruh yig‘ilishi o‘tkazildi. Hozirgacha 14 ta mamlakat bilan ikki tomonlama muzokaralar yakunlandi. Bu tashkilotga aʼzo bo‘lish jarayoni oson emas. Unga hech bir mamlakat haqiqiy o‘zgarishlar qilmasdan kirolmaydi. Bir necha kun oldin prezident Shavkat Mirziyoyev qator davlat korxonalarining eksklyuziv huquqlarini bekor qiluvchi farmonni imzoladilar. Ushbu uzoq muddatli muammo ko‘plab davlat korxonalariga bozor iqtisodiyotiga o‘tish imkonini bermadi va pirovardida xususiy sektor uchun teng imkoniyatlarni cheklab keldi”, — dedi prezident yordamchisi.

Anjumanda O‘zbekiston 2026-yilgacha JSTga aʼzo bo‘lish niyatida ekani eslatib o‘tildi. Tadbirda Toshkentga tashrif buyurgan JST bosh direktori Ngozi Okonjo–Iveala ham ishtirok etib, bunday yirik savdo tashkilotiga aʼzolik siyosiy irodasiz amalga oshmasligini aytdi.

“Hech bir davlat JSTga aʼzolikni siyosiy irodasiz amalga oshira olmagan. Men O‘zbekiston hukumatida kuchli siyosiy irodani ko‘rib turibman. Toshkentga tashrifim chog‘ida mamlakat qonunchiligini JST bitimlariga muvofiqlashtirish to‘g‘risidagi prezident farmoni eʼlon qilindi. Bu muhim hujjatlardan hisoblanadi. Aytmoqchimanki, respublikaning bizning tashkilotga qo‘shilish jarayoni to‘g‘ri yo‘nalishda ketmoqda”, — dedi Ngozi Okonjo–Iveala.

Anjumanda bosh vaziri o‘rinbosari Jamshid Xo‘jayev JSTga qo‘shilish yo‘lida qator sohalarda o‘zgarishlar amalga oshirilayotganini aytdi.

“Hukumat uchun JSTga aʼzo bo‘lish ustuvor masala. Hozirda bojxona, intellektual mulkni himoya qilish sohalarida o‘zgarishlar qilinmoqda. Shuningdek, import litsenziyasi, oshkoralik, savdo rejimini liberallashtirish, soliqlar va boshqa yo‘nalishlarga doir 26 ta hujjat tarjima qilinib, o‘zimizning tizimga kirityapmiz. Davlat ulushi bor korxonalarni xususiylashtirish bo‘yicha 4 ta qonun ishlab chiqmoqdamiz. Bundan tashqari, oziq–ovqat masalasida ham milliy qonunchilikni yangilayapmiz”, — dedi hukumat rasmiysi.

Konferensiyada prezident maslahatchisi Ravshan G‘ulomov 2030-yilgacha O‘zbekistonda erishilishi kutilayotgan natijalar haqida gapirdi

“Kelgusi 7 yil ichida mamlakatda davlat korxonalari sonini 6 barobarga qisqartirilib, xususiy sektorning iqtisodiyotdagi ulushi 85 foizga yetkazish rejalashtirilgan. 2030-yilgacha respublikada kambag‘allik darajasini 7 foizgacha pasaytirish ko‘zda tutilgan. Mazkur muddat mobaynida eksport ulushini 45 milliard dollarga yetkazish maqsad qilingan. Bunda tayyor mahsulot ulushi kamida 3 barobarga oshiriladi. 2030-yilgacha mamlakatdagi qayta tiklanuvchi energiya manbalari jami ishlab chiqarilgan elektr energiyasining 40 foiziga yetishi kutilmoqda”, —dedi prezident maslahatchisi.

Anjuman doirasida panel sessiyalari bo‘lib o‘tdi. O‘zaro muloqotlarda milliy qonunchilikni JST bitimlariga uyg‘unlashtirish, erkin savdoga yo‘l ochish, oziq–ovqat xavfsizligi va boshqa mavzular muhokama qilindi.