Yerga 53 yil oldin “Venera-8” missiyasi doirasida uchirilgan “Kosmos-482” sayyoralararo kosmik apparat qulashi mumkin. Uning geolokatsiyasi Osiyo yoki Markaziy Osiyo davlatlari hududiga to‘g‘ri kelishi taxmin qilinmoqda. “O‘zbekkosmos” eksperti vaziyatga oydinlik kiritdi.
Ma’lum qilinishicha, haqiqatan 1972-yil 31-mart sanasida sobiq Sovet Ittifoqining “Venera” dasturi bo‘yicha “Kosmos-482” sayyoralararo kosmik apparati fazoga uchirilgan. Ammo raketa-tashuvchining yakuniy bosqichi muvaffaqiyatsiz ishlashi oqibatida u Yer orbitasida qolib ketgan.
Apparatning yerga qulashi 9—11-may kunlariga to‘g‘ri kelishi mumkin.
Agentlik “Kosmos-482”ning aniq qayerga qulashini aniqlash biroz mushkul ekanini ma’lum qildi. Uning O‘zbekiston hududiga tushish ehtimoli esa 0,3-0,5 foiz oralig‘ida baholanmoqda.
Apparatning katta qismi atmosferaga kirishi bilan yonib ketsa-da, Veneraning og‘ir sharoitlarida qo‘nish va ishlash uchun mo‘ljallangan yarim tonnaga (500 kg) yaqin massali titan shari alohida xavf tug‘diradi. Bu komponent Yer atmosferasiga kirishda omon qoladi va butunlay qulab tushadi. Parashyut borligiga qaramay, koinotda 53 yil bo‘lganidan keyin u ishlamasligi mumkin. Yerga urilish tezligi esa soatiga 500 km gacha yetishi kutilmoqda.
Kosmik kemaning bo‘laklari topilgan taqdirda, bu haqda zudlik bilan rasmiylarga xabar berish va hech qanday holatda apparat qoldiqlari bilan aloqada bo‘lmaslik tavsiya etildi. Ular tarkibida xavfli kimyoviy moddalar bo‘lishi mumkin.
Sobiq Toshkent mashinasozlik konstruktorlik byurosi mazkur “Venera” dasturining so‘nggi bosqichlarida munosib ishtirok etgan. U “Venera-13 va 14” (1982) va “Vega-1 va 2” (1985) apparatlari uchun grunt olish va burg‘ilash qurilmalarini loyihalashtirgan va ishlab chiqargan. Ularni sinovdan o‘tkazish esa Toshkent viloyatidagi Nevich qishlog‘ida joylashgan sinov markazida amalga oshirilgan.
Izoh (0)