Singapur Milliy universiteti olimlari yomg‘irdan elektr olish usulini ishlab chiqdi. Bunda tomlar elektr stansiya vazifasini bajaradi. Bu haqda ACS Publications xabar berdi.
Yomg‘ir tomchilari harakatlanishi uchun tomda vertikal quvur yasalgan. Suv harakati natijasida zaryad ajralib chiqib, shu orqali elektr energiyasi hosil qilingan. Quvurga tushayotgan yomg‘ir suvining 10 foizidan 12 ta LED chiroqni yoqish uchun yetarli energiya ishlab chiqilgan.
An’anaviy gidroenergetikadan farqli o‘laroq, bu usul katta daryolar yoki suv oqimlariga muhtoj emas. Tadqiqotchilar yomg‘ir ko‘p yog‘adigan shaharlarda tomlarga shunday qurilmalarni o‘rnatish mumkin, deb hisoblamoqda. Bu kam xizmat talab qiladigan, ekologik toza va barqaror energiya manbayi bo‘ladi. Texnologiya yordamida quyosh yoki shamol energiyasi kam joylarda muqobil energiya hosil qilish mumkin bo‘ladi.
Izoh (0)