Rasmiy Seul O‘zbekistonning JSTga a’zo bo‘lishini to‘liq qo‘llab-quvvatlagan holda, xalqaro maydonda tashkilotga a’zo boshqa mamlakatlarni ham O‘zbekiston nomzodini tasdiqlashga chorlaydi. Bu haqda Koreya Respublikasi savdo, sanoat va energetika vaziri An Dok Kin “Menimcha” ko‘rsatuviga bergan intervyusida aytib o‘tdi.
Koreya Respublikasi prezidenti Yun Sok Yolning O‘zbekistonga tashrifi doirasida ikki mamlakat o‘rtasida “Jahon savdo tashkiloti doirasida hamkorlik to‘g‘risida” bayonnoma imzolangan edi. Bu esa Koreya tomoni O‘zbekistonning ushbu tashkilotga a’zoligini qo‘llab-quvvatlashini anglatadi.
O‘zbekiston ayni paytda JSTga a’zo bo‘lish harakatida. Koreya Respublikasi esa bugungi kunda ushbu tashkilot kengashiga raislik qilmoqda. Shuni aytishim kerakki, rasmiy Seul O‘zbekistonning JSTga a’zo bo‘lishini to‘liq qo‘llab-quvvatlagan holda, xalqaro maydonda tashkilotga a’zo boshqa mamlakatlarni ham O‘zbekiston nomzodini tasdiqlashga chorlaydi.
O‘zbekistonning ushbu nufuzli tashkilotga a’zo bo‘lishi iqtisodiy o‘sish suratlarining oshishiga xizmat qiladi. Janubiy Koreya iqtisodiy taraqqiy etishida JSTga a’zo bo‘lishi yaxshi turtki bergan. Ishonamizki, O‘zbekiston taraqqiyoti ham xuddi bizning mamlakatdagidek davom etadi. Buning uchun Koreya tomoni o‘z tajribasini o‘rtoqlashish va bor imkoniyatlarini ishga solishga tayyor, — dedi janob An Dok Kin.
U O‘zbekiston prezidenti iqtisodiy islohotlar siyosatini to‘g‘ri yo‘nalishda amalga oshirayotganini alohida urg‘ulab, mamlakatning iqtisodiy tashabbuslarni kelgusida ham qo‘llab-quvvatlashga tayyor ekanligini aytib o‘tdi.
Ma’lumot uchun, O‘zbekistonning JSTga a’zo bo‘lishi bo‘yicha ishchi guruh 1998-yilda tashkil etilgan edi. Keyingi yillarda ushbu ishchi guruh faqat uch marta uchrashdi va 2005-yillarning o‘rtalariga kelib bu borada xalqaro ekspertlar bilan uchrashuvlar to‘xtab qolgandi.
O‘zbekistonning JSTga a’zo bo‘lish jarayoni 2020-yil iyul oyida bo‘lib o‘tgan ishchi guruhning to‘rtinchi yig‘ilishi bilan rasman qayta tiklandi. Shundan so‘ng 2022-yil iyun, 2023-yil mart va 2023-yil noyabr oylarida yana uchta uchrashuv bo‘lib o‘tdi.
2023-yil sentyabrida Shavkat Mirziyoyev BMT Bosh assambleyasining 78-sessiyasi doirasida Jahon savdo tashkiloti (JST) bosh direktori Ngozi Okonjo-Iveala bilan uchrashuv o‘tkazgandi. Unda JST bosh direktori O‘zbekiston tomonidan tashkilotga a’zo bo‘lish borasida ko‘rilayotgan choralarni yuqori baholagan. Ngozi Okonjo-Iveala JST kotibiyati O‘zbekistonning sa’y-harakatlarini to‘liq qo‘llab-quvvatlashini aytgan hamda mamlakat yaqin kelajakda tashkilotga qo‘shilishiga ishonch bildirgandi.
Izoh (0)