Farg‘onada voyaga yetmagan piyodani urib yuborib, uning o‘limiga sababchi bo‘lgan haydovchiga sud hukmi o‘qildi. Bu haqda Oliy sud matbuot xizmati rahbari xabar berdi.
Qayd etilishicha, Farg‘ona viloyati Furqat tumanida fuqaro Yo‘ldoshev Lacetti transport vositasini boshqarib ketayotib, o‘zidan oldinda ketayotgan Matiz’ni quvib o‘tish vaqtida voyaga yetmagan piyodani urib yuborgan. Hali maktab o‘quvchisi bo‘lgan bola olgan tan jarohatlari oqibatida vafot etgan.
To‘plangan hujjatlar Jinoyat ishlari bo‘yicha Furqat tumani sudida ko‘rib chiqilib, haydovchi Jinoyat kodeksining 266-moddasida (transport vositalari harakati yoki ulardan foydalanish xavfsizligi qoidalarini buzish) nazarda tutilgan jinoyatni sodir etganlikda aybdor deb topildi. Unga nisbatan 2 yil muddatga barcha turdagi transport vositalarini boshqarish huquqidan mahrum qilgan holda, 5 yil muddatga ozodlikdan mahrum etish jazosi tayinlangan.
Yana bir holatda haydovchi Qayumov Nexia mashinasida Uchko‘prik tumanidan Buvayda tumaniga ketayotganida yo‘l chetida ketayotgan velosiped boshqarib ketayotgan fuqaroni urib yuborgan. Jabrlanuvchi olgan tan jarohatlari oqibatida vafot etgan.
Sud hukmi bilan 2 yil muddatga barcha turdagi transport vositalarini boshqarish huquqidan mahrum qilgan holda, 5 yil muddatga ozodlikdan mahrum etish jazosi tayinlangan.
- Avvalroq Toshkent shahar Yashnobod tumanida Captiva urib yuborgan piyoda voqea joyida halok bo‘lgandi.
- Shuningdek, Samarqandda “KamAZ” ayol va uning ikki farzandini urib yuborishi oqibatida bolalar voqea joyida halok bo‘lgani to‘g‘risida xabar berilgan edi.
Izoh (0)